JONES, WILLIAM (1770 - 1837), gweinidog gyda'r Methodistiaid Calfinaidd

un o'r wyth o Ogledd Cymru a ordeiniwyd yn 1811; ganwyd yn 1770, yn fab i Gadwaladr a Catherine Jones, Nant-fudr (Coed-cae-du), Trawsfynydd. Porthmon oedd ei dad, a'i hanfonodd i ysgol yn Lloegr. Wedyn, yn yrrwr gwartheg, aeth y llanc i Lundain, lle'r argyhoeddwyd ef dan bregeth William Romaine. Ymunodd â'r Methodistiaid Calfinaidd yn Nhrawsfynydd, ond yn 1794 ymbriododd â Susan Watkins, gweddw a breswyliai yn hendre hanesyddol Mathafarn yn Llanwrin (gweler dan Dafydd Llwyd ap Llywelyn), ac aeth i fyw yno ac i borthmona. Dechreuodd bregethu yn 1802. Yn 1805, symudodd i dyddyn cyfagos Dôl-y-fonddu, lle y bu farw 1 Mawrth 1837.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Cofiant am William Jones, Dôl-y-Fonddu a'r Parch. E. Griffiths, Meifod … ynghyd a byr-gofiant am Mr. T. Griffiths, a Mrs. M. Griffiths, brawd a mam … E. Griffiths (1770), gan John Hughes, Pontrobert, 1840

Dolenni Ychwanegol

• Wikidata: Q20734660

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/