JONES, JOHN WILLIAM ('Andronicus'; 1842 - 1895), llenor

Ganwyd yn y Bala, 30 Mehefin 1842; mab y Gilrhos (Llangywer) oedd ei dad (siopwr), a Saesnes o ymyl Wrecsam oedd ei fam. Aeth i Gaer yn 1859, i weithio mewn siop; symudodd i Fanceinion yn 1863, a daeth yn drafaeliwr masnachol; ond yn 1884 gafaelwyd ynddo gan y cryd cymalau, a bu'n orweiddiog (yng Nghaernarfon) o hynny hyd ddiwedd ei oes. Bu farw 15 Mehefin 1895, a chladdwyd yn Llanbeblig. Yn fuan ar ôl symud i Fanceinion, dechreuodd sgrifennu i'r Faner; yn nes ymlaen sgrifennai i'r Herald ac wedyn i'r Genedl a'r Cymru. Yr oedd yn sgrifennwr difyr dros ben, a chanddo law neilltuol at atgofion ac at ddisgrifiadau chwareus. Cyhoeddodd yn 1894 Adgofion Andronicus , detholiad o'i ysgrifau; a golygodd R.D. Rowland ('Anthropos') eraill ohonynt yn 1895, dan y teitl Yn y Trên , gydag ysgrifau bywgraffyddol y seiliwyd y nodyn hwn arnynt.

Awdur

• Yr Athro Emeritus Robert Thomas Jenkins, (1881 - 1969)

Gweithiau

• J. W. Jones, Adgofion Andronicus
• J. W. Jones, Robert David Rowland (gol.), Yn y trên: neu, Adgofion trafaeliwr (Caernarfon 1895)

Dolenni Ychwanegol

• VIAF: 73638621
• Wikidata: Q18535752

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/