LEIGH, EDMUND (1735? - 1819), clerigwr Methodistaidd

Ganwyd c. 1735, mab Richard Nash Leigh, curad Llanwynno ac Aberdâr. Ef yw'r ' Edmund Leigh of Penrydd, co. Pembroke ' a urddwyd yn ddiacon gan esgob Tyddewi yn 1760 a'i drwyddedu'n gurad i Henllan Amgoed. Urddwyd ef yn offeiriad yn 1761 a'i drwyddedu'n gurad i Landybïe. Yr oedd yn gurad Llanedi o 1762 hyd ei farw, a gwasanaethai blwyf cyfagos Llandeilo-Talybont hefyd. Daeth i gyswllt â Howel Harris yn 1769 a dechreuodd gyfathrachu â'r Methodistiaid. Mynychai'r sasiynau yn chwarter olaf y ganrif, ond tebyg iddo gadw draw yn ddiweddarach. Bu farw 14 Rhagfyr 1819, yn 84 mlwydd oed, a'i gladdu yn Llanedi.

Awdur

• Y Parchedig Gomer Morgan Roberts, (1904 - 1993)

Ffynonellau

• Cylchgrawn Cymdeithas Hanes y Methodistiaid Calfinaidd, xi, 46-9; xxiii, 4-13; xxxiii, 102
• Bradney, A History of Monmouthshire;, v, 42
• G. M. Roberts, Methodistiaeth fy mro sef ymchwil i ddechreuad Methodistiaeth yn Nwyrain Myrddin (1938), 61-6
• Ep. Registers, Diocese of S. Davids

Dolenni Ychwanegol

• Wikidata: Q20732921

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/