LEWIS, HUBERT (1825 - 1884), gŵr o'r gyfraith

ail fab Edward Clapham Lewis, Ripon, sir Gaerefrog. Cafodd ei addysg yng Ngholeg Emmanuel, Caergrawnt, a daeth yn fargyfreithiwr (Middle Temple) ym mis Mai 1854. Bu'n ŵr prysur yn ei alwedigaeth, yn arbennig fel un yn trefnu trosglwyddiadau ('conveyances'), eithr gwnaeth fwy o enw iddo'i hun fel ysgrifennwr ar rai materion cyfreithiol. Ymysg ei gyhoeddiadau y mae Principles of Conveyancing, 1863; Principles of Equity Drafting, 1865; yr oedd cyn hyn (sef yn 1862) wedi cyhoeddi argraffiad o Goldsmith, Equity. Ei bennaf hawl i goffâd, fodd bynnag, oedd paratoi The Ancient Laws of Wales; cyhoeddwyd hwn yn 1889, wedi marw'r awdur, a'i olygu gan (Syr) John Edward Lloyd, a oedd ar y pryd yn ddarlithydd yng Ngholeg y Brifysgol, Aberystwyth. Nid ydys hyd yn hyn wedi amgyffred gwerth y gwaith hwn gan arloeswr yn hanes cyfraith Cymru ac, yn arbennig, waith gŵr a geisiodd wneuthur astudiaeth gymariaethol o'r gyfraith honno. Yr oedd Lewis wedi ymneilltuo beth amser cyn ei farwolaeth, 6 Mawrth 1884, ym Margate.

Awdur

• Yr Athro Thomas Jones Pierce, (1905 - 1964)

Ffynonellau

• Oxford Dictionary of National Biography
• Hutchinson, A Catalogue of Notable Middle Templars (Llundain 1902), 1902
• F. Boase, Modern English Biography containing many thousand concise memiors of persons who have died since the year 1850, with an index of the most interesting matter, 1897

Dolenni Ychwanegol

• VIAF: 58065832
• Wikidata: Q18576341

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/