LEWIS, THOMAS (1759 - 1842); emynydd

Ganwyd yng Nghwmcynwal, Llanwrda, Sir Gaerfyrddin. Cafodd ychydig addysg yn ei ardal enedigol, a phrentisiwyd ef yn of. Ymsefydlodd fel gof yn Nhalyllychau, ac yno y bu ar hyd ei oes. Cafodd argraffiadau crefyddol dan weinidogaeth y Bedyddwyr, eithr William Lloyd o Gaeo oedd ei dad ysbrydol. Ymunodd â'r Methodistiaid yn Llansawel, ac ef oedd un o sefydlwyr yr achos yn Esgair-nant yn 1806. Cyfrifid ef yn un o flaenoriaid amlycaf y Methodistiaid yn y sir. Enwogodd ei hun fel awdur yr emyn ' Wrth gofio'i riddfannau'n yr ardd,' a ymddangosodd gyntaf mewn casgliad o'r enw Hymnau ar Amryw Destunau (Caerfyrddin, 1823). Bu farw 14 Medi 1842, a chladdwyd ym mynwent Talyllychau.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Drysorfa, 1843, 197-9
• Cymru (O.M.E.), xvi, 37-41
• James Morris, Efengylwyr Seion sef hanes nodweddion a dywediadau amryw o hen bregethwyr y Methodistiaid Calfinaidd yn sir Gaerfyrddin (Dolgellau 1905), 237
• Transactions of the Carmarthenshire Antiquarian Society and Field Club, i, 15
• Cylchgrawn Cymdeithas Hanes y Methodistiaid Calfinaidd, xxvii, 7
• J. Thickens, Emynau a'u Hawduriaid (1945), 184

Dolenni Ychwanegol

• Wikidata: Q20734496

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/