LLOYD, HANNIBAL EVANS (1771 - 1847), awdur a chyfieithydd

Ganwyd yn Llundain, yn fab i Henry Lloyd o Gwmbychan, fferm ym mhlwyf Llanbedr, Sir Feirionnydd. Yr oedd ei fam yn un o ddisgynyddion Garnetts sir Efrog. Collodd ei rieni pan oedd yn ieuanc, a magwyd ef gan berthnasau. Yn 1800 ymsefydlodd yn Hamburg yn yr Almaen, ac yn ddiweddarach ymladdodd yn amddiffyniad y ddinas honno yn erbyn y Ffrancwyr. Dychwelodd i Loegr yng Ngorffennaf 1813 ac apwyntiwyd ef i swydd yn y swyddfa dramor. Bu yno hyd ei farw. Priodasai Fraülein von Schwartzkopff, Hamburg. Bu farw 15 Gorffennaf 1847. Yr oedd yn ieithydd medrus ac yn ysgolhaig da. Efe oedd awdur Hamburg or … Transactions which took place in that city during the first six months of 1813; Alexander I, Emperor of Russia or Sketch of his Life; George IV, Memoirs of his Life and Reign; Descriptive and Historical Illustrations in English and French to accompany J. Coney's Architectural Beauties of Europe; Descriptive and Historical Illustrations to accompany J. M. W. Turner's Picturesque Views in England and Wales; Theoretischpraktische Englische Sprachlehre fur Deutsche, English and German Dialogues. Golygodd a diwygiodd nifer mawr o weithiau hanesyddol a ieithyddol, a chyfieithodd lawer o lyfrau hanesyddol a theithiol yn Saesneg.

Awdur

• Griffith Milwyn Griffiths

Ffynonellau

• Oxford Dictionary of National Biography
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• British Museum. Catalogue of Printed Books (1882)
• H. Blackwell, NLW MS 9265A: A Dictionary of Welsh Biography
• The Gentleman's Magazine, 1847

Dolenni Ychwanegol

• VIAF: 7635024
• Wikidata: Q15994587

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/