LLWYD, ROBERT, 'o'r Waun ' (1565 - 1655), clerigwr a llenor

Ganwyd yn Sir Gaernarfon. Ymaelododd yng Ngholeg Eglwys Crist, Rhydychen, 29 Hydref 1585, a graddiodd yn B.A. 6 Gorffennaf 1588, M.A., 10 Gorffennaf 1591. Bu'n rheithor Helygain (Halkin), 1594-1626, ficer Wrecsam, 1595-1640, ficer y Waun (Chirk), 1615-50, ac yn brebendari Meliden a thrysorydd Llanelwy, 1624-48. Bu hefyd yn rheithor segurswydd Llandysul, Sir Drefaldwyn, 1625; claddwyd ei ferch, Jane, yno, yn 1633. Yr oedd yn un o'r ychydig glerigwyr a amcanai at godi safon grefyddol y Cymry trwy baratoi llenyddiaeth ddefosiynol ar eu cyfer. Cyhoeddodd Pregeth ynghylch Edifeirwch, cyfieithiad o waith Arthur Dent, Presbyteriad Seisnig, yn 1629. Yn 1630, ar gais John Hanmer, esgob Llanelwy cyhoeddodd Llwybr Hyffordd yn cyfarwyddo'r anghyfarwydd i'r nefoedd, etc., cyfieithiad o'r The Plaine Mans Path-way to Heaven gan Dent. Dywedir mai ef hefyd a olygodd ' Feibl Bach ' 1630. Heblaw cyfieithu ei hun, bu'n athro i Rowland Vaughan. Difuddiwyd ef o ficeriaeth y Waun gan gomisiynwyr y Werinlywodraeth yn 1650, ond cafodd gadw £20 y flwyddyn o incwm y fywoliaeth. Bu farw yn 1655.

Awdur

• Syr Glanmor Williams

Ffynonellau

• Alumni Oxonienses: the members of the University of Oxford, 1500 - 1714, iii, 929
• Enwogion y Ffydd (1880), i, 151-8
• W. J. Gruffydd, Llenyddiaeth Cymru o 1450 hyd 1600 (Lerpwl 1922), 112-3
• T. Richards, A History of the Puritan Movement in Wales (1920), 10, 117, 139
• W. Rowlands, Llyfryddiaeth y Cymry (Llanidloes 1869), 104-6, 110-1
• H. B. Thomas, A History of the Diocese of St. Asaph (1874), i, 341, 528; ii, 318

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/