MEREDITH, RICHARD (bu farw 1597), esgob

Leighlin yn Iwerddon, ganwyd yn sir Ddinbych, yn fab, meddir, i un Robert Meredith ap Gronw a Margaret, merch William John ap Gronw. Y mae'n bosibl ei fod o'r un cyff â Meredithiaid Stansty. Gall mai ef yw'r Richard Meredith a raddiodd yn B.A. yng Ngholeg Iesu, 4 Mawrth 1572/3, ond mae sicrwydd iddo dderbyn ei M.A. o'r un coleg yn 1575. Daeth yn gaplan i Syr John Perrot, arglwydd-raglaw Iwerddon, ac yn fuan fe'i dyrchafwyd gan Perrot yn ddeon eglwys S. Patrick ger Dulyn, ac, yn Ebrill 1589, yn esgob Leighlin. Pan gyhuddwyd ei noddwr ar gam dystiolaeth o gynllwynio yn erbyn y frenhines Elisabeth, galwyd Meredith yntau i gyfrif gan y Cyfrin Gyngor, a bu am dymor yn 1591 yn garcharor yn y ' Fleet.' Bu farw 3 Awst 1597, a chladdwyd ef yn eglwys S. Patrick.

Awdur

• Emyr Gwynne Jones, (1911 - 1972)

Ffynonellau

• Geirlyfr Bywgraffiadol o Enwogion Cymru (1870), 726
• Register of the University of Oxford (1884–9), II, iii, 26
• Anthony Wood, Athenae Oxonienses (1813–20) (gol. Bliss), ii, 841-2
• Calendar of State Papers, Domestic SeriesEliz., 1591-4
• Calendar of State Papers relating to Ireland, 1588-92
• Historical Manuscripts Commission. Calendar of the Manuscripts of the Most Honourable the Marquis of Salisbury (1883–1910), iv, 117
• Report on the Manuscripts of the Earl of Egmont (1905–9), ii, 25

Dolenni Ychwanegol

• Wikidata: Q7327783

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/