MORGAN, HECTOR DAVIES (1785 - 1850), clerigwr ac awdur gweithiau diwinyddol

unig fab Hector Davies a Sophia ei wraig, ganwyd (yn Llundain ?) yn 1785. Wedi marw ei daid yn 1800, cymerodd enw ac arfau Morgan, a ddaethai i ran ei daid ar ei (ail) briodas â Christiana, nith ac etifeddes John Morgan o Aberteifi (1686 - 1763?). Bu dan addysg yng Ngholeg y Drindod, Rhydychen, a graddio B.A. yn 1806 ac M.A. yn 1815. Am 37 mlynedd bu'n gurad Castle Hedingham yn Essex; yn 1846 ymneilltuodd i Aberteifi a bu farw yno 23 Rhagfyr 1850.

Ar bwys dau draethawd diwinyddol (un ohonynt ar fedydd) enillodd wobr o £50 a gynigiwyd gan y Gymdeithas er Hyrwyddo Gwybodaeth Gristnogol ac Undeb Eglwysig yn esgobaeth Tyddewi; ac yn 1826 cyhoeddodd waith ar briodas ac ysgariad, a ddisgrifir fel cynnyrch darllen eang a manwl a gwybodaeth o'r gyfraith. Yn 1819 bu'n ' Bampton Lecturer,' ac yn 1820 penodwyd ef gan yr esgob Burgess o Dyddewi yn brebendari Trallwng yng Ngholeg Crist, Aberhonddu.

Awdur

• Thomas Iorwerth Ellis, (1899 - 1970)

Ffynonellau

• Oxford Dictionary of National Biography
• S. R. Meyrick, The History and Antiquities of the County of Cardigan (London 1808), 112

Dolenni Ychwanegol

• VIAF: 29914555
• Wikidata: Q18730390

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/