MORGAN, JOHN (1662 - 1701), clerigwr ac awdur

Ganwyd yn sir Feirionnydd yn 1662. Ordeiniwyd ef yn ddiacon yn 1684, ac yn offeiriad yn 1685; bu'n gurad Llanllechid ac Aber, Sir Gaernarfon, 1685 hyd 1693(?). Yna, efrydydd yn Rhydychen, hyd 1697 yn ôl pob tebyg, pan wnaed ef yn ficer Aberconwy. (Nid yr un â John Morgan, ficer Matchin (1688 - 1734?), ei gyfoesydd.) Yng Nghonwy ysgrifennodd ei Bloeddnad Ofnadwy yr Utcorn Diweddaf, a gyhoeddwyd (wedi ei farw) yn 1704. Ceir copi o'r traethawd hwn a thraethawd arall tebyg iddo, sef Ystyriaethau ar y Chwe peth diweddaf, ynghyd â nifer o ganeuon yr awdur - y cwbl yn ei lawysgrifen ef ei hun - mewn math o chap-book yn dwyn yr enw ' Llyfr John Morgan ' sy'n awr yn llyfrgell Coleg y Brifysgol, Bangor (Bangor MS. 421). Ysgrifennai ryddiaith ragorol, ond cyffredin yw ei farddoniaeth. Bu farw 14 Medi 1701.

Awdur

• John Thomas Jones, (1894 - 1975)

Ffynonellau

• Foster, Alumni Oxonienses: the members of the University of Oxford
• J. C. Morrice, Wales in the Seventeenth Century its literature and men of letters and action (Bangor 1918)
• A. Ivor Pryce, Diocese of Bangor During Three Centuries, seventeenth to nineteenth century inclusive being a digest of the registers of the bishops (1929)
• Conway Parish Register (arg. Alice Hadley)
• J. T. Jones yn Y Llenor: cylchgrawn chwarterol dan nawdd cymdeithasau Cymraeg y colegau cenedlaethol, xvii

Darllen Pellach

• Erthygl Wicipedia: John Morgan

Dolenni Ychwanegol

• VIAF: 29407630
• Wikidata: Q18535818

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/