OWEN, JOHN (1788 - 1867), clerigwr ac awdur

Ganwyd yn 1788 yn fab Owen ac Elinor Owen, Cilirwysg, Llanfihangel Ystrad, Sir Aberteifi - y rhieni yn aelodau gyda'r Methodistiaid Calfinaidd. Cymerth dau o'r meibion urddau eglwysig (sef John a David Owen). Aeth John i ysgol Ystrad Meurig, i'w addysgu gan John Williams ('Yr hen Syr'). Ordeiniwyd ef yn Llanelwy gan yr esgob Cleaver; diacon 1811, offeiriad 1812. Bu'n gurad i ddechrau yn Hirnant 1811-3. Oddi yno aeth i S. Martin, Leicester. Wedi hynny bu'n gurad yn Thrussington, yn yr un sir, a'i benodi yn ficer yno yn 1845, a deon gwlad yn 1853. Yno bellach yr arhosodd hyd ei gladdu ar 31 Gorffennaf 1867. Ysgrifennodd Coffhad am Daniel Rowlands Llangeitho, 1839; A Memoir of Daniel Rowlands, 1840; Memoir of Thomas Jones of Creaton, 1851; a llyfrau eraill.

Awdur

• Y Parchedig Daniel Williams, (1878 - 1968)

Ffynonellau

• Yr Haul, 1842, 195
• Crockford's Clerical Directory
• Benjamin Williams (Gwynionydd), Enwogion Ceredigion (1869)
• Edward Morgan, Ministerial records: or Brief accounts of the great progress of religion, under the ministry of those eminent, learned, and pious ministers of God, the Rev. D. Rowlands, of Llangeitho, the Rev. W. Williams, of Pant-y-Celin, the Rev. D. Jones, of Llangan (London 1840)
• Y Geninen, 1897, 35

Dolenni Ychwanegol

• VIAF: 52777293
• Wikidata: Q20733588

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/