OWENS, OWEN (1792 - 1862), gweinidog gyda'r Annibynwyr ac ysgolfeistr

Ganwyd ym Maes Angharad, Dolgellau, 21 Awst 1792. Derbyniwyd ef yn aelod gan Cadwaladr Jones yn Nolgellau yn 1811. Bu'n cadw ysgol yn y cylch am ysbaid, a symudodd at yr un gorchwyl i Ddinas Mawddwy, lle y dechreuodd bregethu. Yn 1821 urddwyd ef yn weinidog eglwysi Rhesycae a Salem, Sir y Fflint, ac yno y treuliodd weddill ei oes. Bu farw 13 Hydref 1862, a chladdwyd ef ym mynwent eglwys plwyf Nannerch. Cadwai ysgol ddyddiol yn Rhesycae yn ogystal â gweinidogaethu; llafuriodd yn galed i ddiddyledu capelau a theithiodd lawer i'r amcan hwn. Adnabyddid ef fel ' pregethwr synhwyrol ' a ' Chalfin cymedrol.' Ag ystyried ei anfanteision, llwyddasai i ennill mesur helaeth o ddiwylliant; lluniodd erthyglau lu i'r Dysgedydd a chyhoeddodd Holwyddoreg yr Ymneillduwyr Protestanaidd, gan y Parch. S. Palmer a'i helaethu gan O. Owens, Rhesycae. Cynrychiolai y teip gorau o weinidog cefn gwlad yn yr oes honno.

Awdur

• Y Parchedig Richard Griffith Owen, (1890 - 1973)

Ffynonellau

• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 345-6
• Hanes Eglwysi Annibynnol Cymru, iv, 240-1

Dolenni Ychwanegol

• Wikidata: Q20734105

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/