PARRY, THOMAS (bu farw 1709), gweinidog y Bedyddwyr Neilltuol

yn Llaneigon a'r Gelli yn nyddiau'r Adferiad a chyfnod cynnar Deddf Goddefiad. Yr oedd yn arwyddo cofnodion cymanfa'r Fenni yn 1653 a chofnodion cymanfa Llanwenarth yn 1705; rhwng y blynyddoedd hynny bu mewn dwfn brofedigaethau oherwydd y cyfreithiau celyd, fel y prawf ei ymddangos aml o flaen llys 'consistory' Aberhonddu. Trigai yn y Wenallt ger Llaneigon. Adroddir am ei gyfeillgarwch â Vavasor Powell, ond nid ar ryw seiliau sicr iawn; a dywedir hefyd iddo fugeilio Bedyddwyr gogledd Brycheiniog a gorllewin Maesyfed, ond rhaid yw cofio bod aroglau trwm o Arminiaeth a rhydd-gymundeb ar y Bedyddwyr hynny, ac mai Bedyddiwr caeth oedd Thomas Parry. Anaml y cyfeirir ato heb ddyfynnu'r rhigwm a'i cymhara'n ffafriol iawn fel pregethwr ag offeiriad y Gelli.

Awdur

• Thomas Richards, (1878 - 1962)

Ffynonellau

• Joshua Thomas, Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778) (arg. Pontypridd), 152-4, 157-8
• Hanes y Bedyddwyr yn Nghymru, ii, 438-9

Dolenni Ychwanegol

• Wikidata: Q20738166

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/