PHILLIPS, EVAN (1829 - 1912), gweinidog gyda'r Methodistiaid Calfinaidd

Ganwyd 22 Hydref 1829 mewn bwthyn o'r enw Milestone yn ardal Capel y Drindod. Yr oedd ei fam yn ferch i gefnder Christmas Evans. Dechreuodd bregethu yn eglwys Capel y Drindod pan oedd ychydig dros 20 oed. Treuliodd ddwy flynedd yn ysgol Atpar, Castellnewydd Emlyn, ac yn 1853 derbyniwyd ef i Goleg Trefeca. Yn nechrau hydref 1859 priododd Anne Jones, o deulu Cwrcoed, ger Penrhiwllan. Wedi rhai misoedd fel gofalwr am y seiadau yn Llannon symudodd i fyw i Gastellnewydd Emlyn; ordeiniwyd ef yng Nghastell Nedd yn Awst 1860; yn yr un flwyddyn derbyniodd alwad i fugeilio eglwys Bethel, Castellnewydd Emlyn, ac fel gweinidog Bethel y treuliodd weddill ei oes. Etholwyd ef yn llywydd ei gymdeithasfa yn 1889, ac yn llywydd y gymanfa gyffredinol yn 1899. Yr oedd yn un o bregethwyr mawr ei oes. Oherwydd newydd-deb a disgleirdeb ei ddrychfeddyliau, naturioldeb ei ddarluniau, ynghyd â melyster ei ddawn, enillodd ' y pregethwr ugain munud ' le arbennig iddo'i hun. Nodweddid ei bregethau gan gyfuniad o ddychymyg y bardd, treiddgarwch yr athronydd, a thanbeidrwydd yr efengylydd. Bu farw 29 Medi 1912.

Awdur

• Y Parchedig Robert Beynon, (1881 - 1953)

Ffynonellau

• 'Y Parch. Evan Phillips: (80ain mlwydd oed, Hydref, 1909Y Geninen, Hydref 1910, tt.264-268
• Y GeninenIonawr 1911
• J. J. Morgan, Cofiant Evan Phillips Castell Newydd Emlyn (1930)

Dolenni Ychwanegol

• Wikidata: Q20746779

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/