PHILLIPS, MORGAN (bu farw 1570), offeiriad Catholig

Ganwyd yn sir Fynwy. Ymaelododd ym Mhrifysgol Rhydychen, 1533, a daeth i gymaint o fri fel athronydd a dadleuydd fel y cafodd yr enw ' Morgan the Sophister.' Etholwyd ef yn gymrawd o Goleg Oriel, 1538, a bu'n brifathro Neuadd y Santes Fair, 1546-50. Daeth yn ganton eglwys gadeiriol Tyddewi yn 1553, ond yn fuan wedi i Elizabeth ddod i'r orsedd ciliodd i'r Cyfandir. Trigai yn Douai yn 1568 yng nghwmni dau alltud nodedig arall, y Dr. Owen Lewis a'r Dr. William Allen, a chynorthwyodd Allen i sefydlu coleg enwog Douai a hyfforddai offeiriaid Catholig ar gyfer y maes cenhadol Seisnig. Yr oedd yn bleidiwr selog i Mari, frenhines y Sgotiaid, ac yn 1571 sgrifennodd Defence of the Honour of Mary Queen of Scotland a gyhoeddwyd yn Douai. Bu farw 18 Awst 1570.

Awdur

• Emyr Gwynne Jones, (1911 - 1972)

Ffynonellau

• Anthony Wood, Athenae Oxonienses (1813–20) (gol. Bliss), i, 432-3
• Robert Williams, Enwogion Cymru. A Biographical Dictionary of Eminent Welshmen (1852)
• First Douay Diary and The Second Douay Diary, 3, 5
• W. Llewelyn Williams, yn Trafodion Anrhydeddus Gymdeithas y Cymmrodorion, 1901-2, 54-5

Dolenni Ychwanegol

• Wikidata: Q18756975

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/