PHILLIPS, THOMAS (1806-1870), gweinidog gyda'r Methodistiaid Calfinaidd ac ysgrifennydd Cymdeithas y Beiblau yng Nghymru

Ganwyd 15 Mawrth 1806 yn Llanymddyfri. Effeithiwyd arno gan ddiwygiad 1819, a dechreuodd bregethu yn 1821, gan fwriadu mynd i'r genhadaeth dramor, ond yn 1825, ar fin mynd i Goleg Cheshunt i'w baratoi, gofynnwyd iddo ymgymryd â chenhadaeth dros y Methodistiaid Calfinaidd yn y Gelli (Hay), a bu yno am 10 mlynedd yn cenhadu ac yn cadw ysgol. Ddechrau 1836, penodwyd ef yn ysgrifennydd dros Gymru i Gymdeithas y Beiblau, a symudodd i dref Henffordd. Bu'n hynod lwyddiannus fel ysgrifennydd, ac ar adeg ei farw ef oedd swyddog hynaf y gymdeithas; arno ef, yn 1853, y rhoddwyd gofal dathliad ei jiwbili - ar yr achlysur hwnnw y cyhoeddodd Llyfr y Jubili, 1854. Cyhoeddodd hefyd gatecism ar Babyddiaeth, a aeth drwy sawl argraffiad, a The Welsh Revival, 1860. Yr oedd yn drefnydd medrus; cymerth ran flaenllaw yng nghychwyniad cymanfa gyffredinol y Methodistiaid Calfinaidd, ac ef oedd ei hail lywydd (1865). Bu farw yn Henffordd, 28 Hydref 1870. Y mae cofiant Saesneg iddo, a gyfieithwyd yn 1871, ac ysgrif lawn yn Y Gwyddoniadur, y seiliwyd y nodyn hwn arni; gweler hefyd Cardiff Catalogue.

Mab hynaf iddo oedd

THOMAS LLOYD PHILLIPS (1832 - 1900), offeiriad ac athro ysgol

Fe'i prentisiwyd i Thomas Gee a cyhoeddodd, 1856, Llawiadur i'r Iaith Seisonig; cafodd urddau yn Eglwys Loegr yn 1859, a graddiodd o Goleg Iesu, Rhydychen, yn 1866; cadwai ysgol yn Beckenham (Foster, Alumni Oxonienses; Asaph).

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Gwyddoniadur Cymreig (1889–96)
• Catalogue of Printed Literature in the Welsh Department, Cardiff Free Libraries (1898)

Darllen Pellach

• John Griffith, Cofiant am y Parch. Thomas Phillips, D.D., Ysgrifennydd taleithol hynaf y Fibl Gymdeithas Frytanaidd a Thramor: a fabwysiadwyd gan y cyfeisteddfod ar achlysur ei farwolaeth; ynghyd ag annerchiad a draddodwyd gan John Griffith yn uniongyrchol ar ôl ei gladdedigaeth (Llundain 1870?)

Delweddau

• John Thomas, Revd Dr Thomas Phillips, Hereford (1806-70)
• John Thomas, Revd Dr Thomas Phillips, Hereford (1806-70)
• John Thomas, Thomas Phillips
• John Thomas, Parch. Thomas Phillips

Dolenni Ychwanegol

• VIAF: 16774626
• Wikidata: Q20734516

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/