PIERCY, ROBERT (1825 - 1894), peiriannydd sifil

Ganwyd yn Nhrefeglwys, Maldwyn, 25 Ionawr. 1825, mab hynaf Robert Piercy, a brawd Benjamin. Addysgwyd ef yn ysgol ramadeg y Waun a'i hyfforddi yn swyddfa'i dad. O 1847 i 1855 bu'n beiriannydd i'r New British Iron Company, perchnogion glofeydd a gweithfeydd o gylch Acrefair. Bu'n arolygu eu rheilffyrdd, eu glofeydd, a'u gweithfeydd, ac yn adeiladu rheilffyrdd i Riwabon. Ymunodd â'i frawd, gan fod yn gyfrifol yn bennaf am y gwaith swyddfa, i adeiladu rheilffyrdd Sir Drefaldwyn, a byw i ddechrau yn y Trallwng, ac ar ôl hynny yn Llundain. Peiriannydd ymarferol ydoedd, uwchlaw popeth; mesurydd a lefelydd hyfedr, ac iddo enw am ei allu i drin seiliau bradwrus i bontydd. Rhwng 1870 a 1879, bu'n cynorthwyo'i frawd yn Sardinia; o 1879 i 1884 yr oedd yn adeiladu Rheilffordd Assam yn India. Yno darganfu ac agorodd wely anferth o lo, a ffynhonnau olew. Dychwelodd i Loegr yn 1887, gan dreulio'r rhan fwyaf o'i amser yn Llundain ac ysbeidiau yn yr Yswisdir. Bu farw 29 Ionawr 1894 yn y Celyn, Caergwrle, a chladdwyd ef ym mynwent eglwys y Waun. Ei wraig oedd Miss Valleria a briododd c. 1874. Bu iddynt un mab a dwy ferch.

Awdur

• Evan David Jones, (1903 - 1987)

Ffynonellau

• Obituary: Robert Piercy, 1825-1894, Minutes of Proceedings of the Institution of Civil Engineers, cxviii, 452-3
• R. Williams, Montgomeryshire Worthies (1894), 242

Dolenni Ychwanegol

• Wikidata: Q20746839

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/