POWELL, JONATHAN (1764 - 1823), gweinidog gyda'r Annibynwyr

Ganwyd yn Defynnog, sir Frycheiniog, yn 1764. Yng Ngodrerhos, Morgannwg, y dechreuodd bregethu. Yn 1790 cafodd alwad i Raeadr Gwy, Maesyfed, ac yno yr urddwyd ef. Helbulus fu ei hanes yno. Ymddengys ei fod yn ddisgyblwr llym, a mynnai ddiarddel rhywrai a goleddai syniadau Sabelaidd, ond ni chytunai yr eglwys ag ef a phenderfynodd ymadael. Yn 1798 symudodd i ofalu am eglwysi Rhosymeirch a Chapel Mawr, Môn. Ychydig oedd nifer y gweinidogion yn y sir i gyd pan ddaeth ef yno, a bu â rhan mewn sefydlu amryw eglwysi, ac yn ei gyfnod cofrestrwyd cynifer ag 28 o leoedd i'r Annibynwyr addoli ym Môn. Yr oedd yn ŵr dawnus a galluog, yn fyfyriwr dyfal a gyfrifid yn un o wŷr blaenaf yr enwad yn y Gogledd. Cyfieithodd rai llyfrau Saesneg yn Gymraeg ac yr oedd yn emynydd o gryn fri. Yn 1796 cyhoeddodd lyfryn o emynau o'i waith ei hun, Llawenydd yn Nglyn Wylofain, ac yn 1805 Y Credinwyr yn Angau, a gymerwyd allan o waith Thomas Watson. Lluniodd farwnad i Richard Tibbott, 1798. Ymddeolodd oherwydd gwendid yn 1821. Bu farw 6 Gorffennaf 1823, a chladdwyd ef ym mynwent capel Rhosymeirch.

Awdur

• Y Parchedig Richard Griffith Owen, (1890 - 1973)

Ffynonellau

• Hanes Eglwysi Annibynnol Cymru, ii, 460
• Y Dysgedydd, 1823, 257
• Y Geninen, 1895, 97
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 409
• W. A. Griffiths, Hanes Emynwyr Cymru (Caernarfon 1907), 127-8
• Y Caniedydd Cynulleidfaol Newydd casgliad o donau, emynau, côr-ganau, ac anthemau (Llundain 1921), emynau 332 a 510

Dolenni Ychwanegol

• Wikidata: Q20733693

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/