POWELL, THOMAS (1781 - 1842), gweinidog Annibynnol ac awdur

Ganwyd yn 1781 yn Trecastell, sir Frycheiniog. Cafodd ysgol dda yn ieuanc, a bu am gyfnod yn cadw ysgol yn Llanelli, Brycheiniog. Yn ystod yr amser hwnnw ymunodd â'r eglwys yn Llangatwg, Brycheiniog. Bu yn athrofa Wrecsam dan Jenkin Lewis o 1804 hyd 1808. Urddwyd ef yn weinidog yn Ninbych, 27 Hydref 1808. Yn ystod ei dymor yn Ninbych bu ganddo law yng nghychwyn achosion Annibynnol yn Llanelwy. Yn 1814, wedi priodi merch o deulu cefnog yn Aberhonddu, symudodd yno i weinidogaethu yn y Plough. Symudodd i Frynbuga, sir Fynwy, yn 1828, ac yno y treuliodd weddill ei oes. Bu farw yno 4 Chwefror 1842. Cyhoeddodd Ym Mhlaid y Gymdeithas Genhadol, Y Cristion o fewn ychydig, Bedydd Babanod, Cyfieithiad Calfin ar y Salmau, a Gair Duw, 1821. Yr oedd yn bregethwr dawnus ac yn bersonoliaeth hoffus.

Awdur

• Y Parchedig John Dyfnallt Owen, (1873 - 1956)

Ffynonellau

• Hanes Eglwysi Annibynnol Cymru, i, 88-9
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 407
• Charles Ashton, Hanes llenyddiaeth Gymreig o 1651 O.C. hyd 1850 (1893), 446
• Catalogue of Printed Literature in the Welsh Department, Cardiff Free Libraries (1898)

Dolenni Ychwanegol

• Wikidata: Q20734518

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/