PRICE, JOHN (1857 - 1930), cerddor

Ganwyd 5 Mawrth 1857 yn Llangamarch, sir Frycheiniog, mab Dafydd ac Ann Price. Symudodd y teulu i fyw i Beulah, ger y Garth, sir Frycheiniog, lle y bu byw ar hyd ei oes. Yn fachgen dysgwyd iddo gyfundrefn Hullah a daeth i ddarllen cerddoriaeth yn rhwydd. Ymunodd yn nosbarth solffa D. Buallt Jones, a chafodd wersi gan D. W. Lewis, Brynaman, a graddiodd yn G. a L.T.S.C. Cynhaliodd ddosbarthiadau cerddorol ar hyd a lled ardaloedd siroedd Brycheiniog, Maesyfed, a Chaerfyrddin. Bu'n arwain ac yn llwyddiannus gydag amryw gorau, ac yn arweinydd a chôr-feistr gwyliau cerddorol archddeoniaeth Caerfyrddin, a beirniadodd mewn llawer o eisteddfodau. Cyfansoddodd lawer o ddarnau cerddorol, a cheir hwynt yng ngherddoriaeth Y Cerddor. Bu ei anthemau, ' Clyw, f'enaid clyw ' a ' Dyma'r dydd, ' ei ganig ' Dyddiau haf ' a darnau eraill, yn boblogaidd. Bu farw 21 Ebrill 1930, a chladdwyd ei ym mynwent Beulah.

Awdur

• Robert David Griffith, (1877 - 1958)

Ffynonellau

• Y Cerddor, Mawrth 1905

Dolenni Ychwanegol

• VIAF: 31711614
• Wikidata: Q20804722

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/