PUGH, EDWARD (c. 1761 - 1813), peintiwr map-ddarluniau a golygfeydd

Dywedir iddo gael ei eni yn Rhuthyn. Dangoswyd 23 o'i ddarluniau yn yr Academi Frenhinol rhwng 1793 a 1808, y mwyafrif ohonynt yn fân-ddarluniau, gan gynnwys un darlun o Thomas Edwards ('Twm o'r Nant'). Ymddengys mai yn Llundain y treuliodd y rhan fwyaf o'i amser yn ystod y blynyddoedd hyn er mai yng Nghaerlleon y ceir ei gyfeiriad yn 1800. Dangoswyd un darlun arall o'i eiddo yn yr Academi yn 1821. Dywedir iddo ymuno â chorfflu gwirfoddol o artistiaid yn 1803. Defnyddiwyd darluniau o'i eiddo ar gyfer Modern London, a gyhoeddwyd yn 1805, ac ysbrydolwyd ef gan Boydell i ysgrifennu disgrifiad o Ogledd Cymru. Cyhoeddwyd y gwaith hwn, ynghyd â dros 70 o ddarluniau gan yr awdur, yn 1816, ar ôl marw Pugh, dan y teitl Cambria Depicta: A Tour through North Wales. Yn ôl y rhagair, dyddiedig yn Rhuthyn, 10 Mai, 1813, bu wrth y gwaith am naw mlynedd. Bu farw Edward Pugh, a ddisgrifir fel 'limner,' yn Well Street, Rhuthyn, yn 52 mlwydd oed, a chladdwyd ef yn Rhuthyn 20 Gorffennaf 1813.

Awdur

• Megan Ellis, (1906 - 2001)

Ffynonellau

• Basil Long, British Miniaturists (1929)
• Graves, The Royal Academy of Arts (1905–6)
• cofysgrifau esgobaeth Llanelwy yn Ll.G.C.

Darllen Pellach

• Erthygl Wicipedia: Edward Pugh

Gweithiau

• Edward Pugh, DV DV407 (4to): Cambria Depicta
• John Chapman a Edward Pugh, The Cambrian Shakespeare

Dolenni Ychwanegol

• VIAF: 21929881
• Wikidata: Q18200042

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/