REES, DANIEL (1793 - 1857), clerigwr ac emynydd

Ganwyd 8 Chwefror 1793, yn y Felin Newydd, Llangeler, Sir Gaerfyrddin, mab Ebenezer Rees. Addysgwyd ef yn ysgol Castell Hywel a Choleg Iesu, Rhydychen. Bu'n gurad y Goetre, sir Fynwy, yn 1818-23, a phenodwyd ef yn gurad parhaus Aberystruth yn 1823. Bu farw 13 Mehefin 1857. Ar gais esgob Llandaf cyhoeddodd Casgliad o Psalmau a Hymnau (W. Rees, Llanymddyfri), yn 1831, a A Selection of Psalms and Hymns (Llanymddyfri) yn 1832. Bu'r ddau gasgliad yn boblogaidd iawn yn yr Eglwys Sefydledig, canys ymddangosodd 6ed argraffiad yr un Cymraeg yn 1860, a 7fed argraffiad yr un Saesneg yn 1858. Y mae ambell drosiad ac emyn gwreiddiol o'i waith yn y naill gasgliad a'r llall.

Awdur

• Y Parchedig Gomer Morgan Roberts, (1904 - 1993)

Ffynonellau

• D. E. Jones, Hanes Plwyfi Llangeler a Phenboyr (Llandysul 1899), 314
• Bradney, i, 422, 477
• Catalogue of Printed Literature in the Welsh Department, Cardiff Free Libraries (1898)

Dolenni Ychwanegol

• Wikidata: Q5218555

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/