REES, DAVID (1683? - 1748), gweinidog gyda'r Bedyddwyr a diwinydd

Dywedir ei eni yn 1683, yn fab i Rees David, amaethwr cefnog o gyffiniau Caerffili ac aelod selog yn eglwys Fedyddiedig yr Hengoed. Addysgwyd ef gan Samuel Jones ym Mrynllywarch, ac ymddengys ei fedyddio a'i gymell i bregethu yn yr Hengoed yn y 1700au cynnar, ar ddechrau gweinidogaeth Morgan Griffith.

Ordeiniwyd ef yn weinidog eglwys Limehouse yn Llundain, yn 1709, ac yno y bu hyd ei farw, 26 Mai 1748, yn 64 oed. Y mae sôn amdano yn cymodi mewn dadl Arminaidd yn yr Hengoed yn 1730, a'i waith ef yn enw ei eglwys yw'r erthygl ynghylch arddodiad dwylo yn argraffiad 1721 o'r Gyffes Ffydd Gymraeg, ond cofir ef orau am ei ddadl fedydd â Fowler Walker, y Fenni, a'i weithiau ar y pwnc: (1) Adnodau ar rai Lleoedd Cableddus a Sarhaus o Lyfrau … ar Fedydd Plant, 1732, ac (2) Infant Baptism, No Institution of Christ, 1734. At hyn, cyhoeddodd (3) A Free and Sober Enquiry into the truth of certain paragraphs contained in the Assembly's Shorter Catechism, 1736; (4) Reasons for and against Singing of Psalms, 1737; a thair pregeth dan y teitlau (5) The State of True Religion in all Ages, 1726, a (6) A Modest Plea for the maintenance of the Christian Ministry, 1729, a (7) A View of the Divine Conduct, in the Government of this Lower World, 1730; ac argraffwyd ei bregeth angladdol gan Joseph Stennett dan y teitl The Everlasting Covenant the best Support, 1748.

Awdur

• Benjamin George Owens

Ffynonellau

• Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778), 180
• Joshua Thomas, A History of the Baptist Association in Wales (1795), 45
• Hanes y Bedyddwyr yn Nghymru, iii, 33
• Joseph Stennett, The everlasting covenant the best support, under all afflictions, and at a dying hour (London 1748)
• W. Rowlands, Llyfryddiaeth y Cymry (Llanidloes 1869), 361, 365
• Hengoediana, sef, Hanes Eglwys y Bedyddwyr yn Hengoed (1861), 08
• The New Hengoediana, or the History of Hengoed Baptist Church (1910), 37
• William Richards, John Evans (gol.), The Welsh nonconformists' memorial, or, Cambro-British biography: containing sketches of the founders of the Protestant dissenting interest in Wales, 261
• H. Blackwell, NLW MS 9271A: A Dictionary of Welsh Biography
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 463
• Enwogion y Ffydd (1880), iii, 119
• Y Gwyddoniadur Cymreig (1889–96), ail arg., ix, 48D
• Geirlyfr Bywgraffiadol o Enwogion Cymru (1870), 874

Dolenni Ychwanegol

• VIAF: 54576643
• Wikidata: Q20732883

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/