ROBERTS, JOHN (1753 - 1834), gweinidog gyda'r Methodistiaid Calfinaidd

Ganwyd ym Mlaenygarth, Dyffryn Nantlle (yr oedd yn frawd i'r pregethwr hynod, Robert Roberts, Clynnog). Gweithiodd am gyfnod yn chwarel y Cilgwyn. Wedi iddo gael peth addysg bu'n cadw ysgol mewn gwahanol leoedd ac adwaenid ef am flynyddoedd fel John Roberts, Llanllyfni. Dechreuodd bregethu pan oedd yn 27 oed. Wedi ei briodas â Mrs. Lloyd, Cefn Nannau, Llangwm, aeth i'r ardal honno i fyw. Ordeiniwyd ef yn gyflawn weinidog yn adeg yr ordeiniad cyntaf, 1811. Bwriodd ei ddyddiau o 1809 hyd ei farwolaeth, 3 Tachwedd 1834 (yn 82 oed), yn Llangwm. Dyn byr o gorff oedd, ond o gyfansoddiad cryf. Bu iddo ran yng nghyfansoddiad y Gyffes Ffydd a'r rheolau disgyblaeth yn 1823, a chyfrifid ef yn drefnydd ac ysgrifennydd medrus iawn. Er nad oedd yn danllyd huawdl fel ei frawd, Robert Roberts, yr oedd yn rymus a rhwydd ei ymadrodd, a phrin y ceid neb un a bregethodd mor gyson yng nghymdeithasfaoedd ei gyfundeb yn Ne aGogledd Cymru am gynifer o flynyddoedd. [Ganwyd 8 Awst 1753; mab iddo oedd Michael Roberts.

Awdur

• Y Parchedig Richard Thomas, (1872 - 1950)

Ffynonellau

• Methodistiaeth Cymru (1851–6), ii, 259
• J. Jones ('Myrddin Fardd'), Cofiant a phigion o bregethau y Parch. Michael Roberts, Pwllheli (Pwllheli 1883)
• J. Morgan Jones a W. Morgan, Y Tadau Methodistaidd (1895-1897), ii, 76-89
• W. Williams, Methodistiaeth Dwyrain Meirionydd (1902), 401-4
• Joseph Evans, Biographical Dictionary of Ministers and Preachers of the Welsh Calvinistic Methodist Body … to the close of the year 1850 (1907), 267

Dolenni Ychwanegol

• Wikidata: Q20804726

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/