SALISBURY, ENOCH ROBERT GIBBON (1819 - 1890), cyfreithiwr a chasglydd llyfrau

Ganwyd 7 Tachwedd 1819 yn fab hynaf i Joseph Salisbury, Bagillt. Cododd o ddechreuadau dinod, ar ôl bwrw peth amser yn Lerpwl, i fod yn bennaeth gwaith nwy Caerlleon-fawr ac yn ŵr amlwg ym mywyd cyhoeddus y ddinas honno. Yn 1850, troes at y gyfraith gan ymaelodi yn yr Inner Temple, ac yn 1852 galwyd ef i'r Bar; cafodd lawer o waith fel dadleuydd gerbron pwyllgorau'r Senedd. Bu am gyfnod byr (1857-9) yn aelod seneddol (Rhyddfrydol) dros Gaerlleon. Casglodd lyfrgell anarferol helaeth o lyfrau ar Gymru a'r goror - hon, heddiw, yw ' Llyfrgell Salisbury ' yng Ngholeg Caerdydd, ond y mae hefyd gryn nifer o'i lyfrau yn llyfrgell Coleg y Gogledd. Merch i'r gweinidog Annibynnol Arthur Jones o Fangor oedd ei briod. Bu farw yn Saltney, 27 Hydref 1890. Cafodd ei fab, PHILIP SALISBURY (a fu farw'n gynnar yn 1906), yrfa anturus fel milwr ym myddin Serbia ac wedyn yng ngwasanaeth y Belgiaid ar y Congo.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Albert Nicholson, Salisbury, Enoch Robert Gibbon (1819–1890)Oxford Dictionary of National Biography

Darllen Pellach

• J. Hubert Morgan, A letter from a book collector; E. R. G. Salisbury, Journal of the Welsh Bibliographical Society, Cyf. 5, Rh. 1 (Awst 1937), tt.33-40
• Casgliadau Arbennig ac Archifau Prifysgol Caerdydd: Cyflwyniad i Lyfrgell Salisbury: Llyfrgell ‘Gymreig’ gyntaf y byd (cyrchwyd Tachwedd 2020)
• Erthygl Wicipedia: Enoch Salisbury

Dolenni Ychwanegol

• Wikidata: Q16062575

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/