SAUNDERS, DAVID (1831 - 1892), gweinidog gyda'r Methodistiaid Calfinaidd, pregethwr huawdl

Ganwyd 20 Mai 1831 yng Nghastellnewydd Emlyn. Aeth i Goleg Trefeca yn 1851, ac oddi yno i Brifysgol Glasgow. Dychwelodd adref yn fuan oblegid ei oddiweddyd gan haint. Ymsefydlodd fel gweinidog ym Mhenclawdd, ond ni bu yno'n hir cyn symud i Fethania, Aberdâr, yn 1857. Tra yno bu'n olygydd Y Gwladgarwr am gyfnod. Yn 1862 symudodd i Lerpwl, a than ei arweiniad ef y codwyd adeiladau yr eglwys yn Princes Road; ond yn 1868 symudodd i Abercarn, sir Fynwy. Trodd ei wyneb i'r Triniti, Abertawe, yn 1873, ac yno y gorffennodd ei rawd. Bu farw 14 Hydref 1892. Etholwyd ef yn llywydd y gymanfa gyffredinol yn 1877, ac yn llywydd cymdeithasfa'r De yn 1880. Yr oedd yn un o brif hyrwyddwyr y gynhadledd yn Aberystwyth (22 Medi 1880) i drafod pwnc addysg ganolraddol yng Nghymru. Yn ei gyfundeb ef ei hunan, ymdrechodd yn galed (ond yn ofer) i gael un coleg diwinyddol i'r holl enwad; cymerth ran yng ngwasanaeth sefydlu Coleg Diwinyddol y Bala yn 1891. Priododd ferch i John Howell, Pencoed (Morgannwg), bardd a blaenor - tad y deon David Howell.

Awdur

• Y Parchedig James Ednyfed Rhys, (1876 - 1960)

Ffynonellau

• Y Geninen, Mawrth 1893, 35; 1907, 35
• W. James, Cymru (O.M.E.), iii, 249
• W. James (gol.) a John Morgan Jones (gol.), Cofiant a phregethau y Parchedig D. Saunders, D.D. (Abertawe 1894)

Darllen Pellach

• Portrait and Biographical Sketch of Rev. D. Saunders, D.D., Swansea, The Christian standard: the monthly magazine of the Cardiff Evangelistic movement, Vol. I, no.6, December 1891

Delweddau

• John Thomas, Dr. David Saunders, Swansea
• Alfred Freke, David Saunders
• LlGC: David Saunders
• LlGC: David Saunders

Dolenni Ychwanegol

• VIAF: 103527390
• Wikidata: Q20804682

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/