SYMMONS (TEULU), Llanstinan, Sir Benfro

JOHN SYMMONS (1701 - 1771?), aelod seneddol Aberteifi

Mab John Symmons, Llanstinan, (siryf Sir Benfro, 1713), a Martha, merch George Harries, Tregwynt; ganwyd 12 Medi 1701. Methodd â chael ei ddewis yn aelod seneddol sir Benfro yn 1741 eithr llwyddodd i gael cynrychioli Aberteifi yn 1746 (20 Mawrth); daliodd y sedd hyd 1761. Rhoes gymorth ariannol tuag at atgyweirio eglwys Aberteifi ac ailfwrw ac ailosod ei chlychau yn 1748 (Meyrick, Hist. of County of Cardigan). Yr oedd yn gyd-ysgrifennydd y ' Society of Sea Serjeants ' yn y cyfarfod a gynhaliwyd yn Abertawe ar 13 Mehefin 1752. Bernir mai ef yw'r John Symmons a fu farw yn George Street, Hanover Square, Llundain, 7 Tachwedd 1771.

Mab iddo oedd

CHARLES SYMMONS (1749 - 1826), clerigwr a llenor

Ganwyd yn nhref Aberteifi (medd Asaph). Bu yn Ysgol Westminster (14 Ionawr 1765), prifysgolion Glasgow, Caergrawnt (B.D. 1786), a Rhydychen (D.D. 1794). Ordeiniwyd ef c. 1775, cafodd reithoraeth Arberth (gyda Robeston), Sir Benfro, 1778, a'i ddewis yn brebend Clydau yn eglwys gadeiriol Tyddewi, 11 Hydref 1789; trwy gymorth ei gyfaill William Windham cafodd (yn 1794) reithoraeth Llanbedr Efelffre yn ychwanegol at un Narberth. Priododd, 1779, Elizabeth (bu farw 1830), merch John Foley, Ridgeway, Sir Benfro, a chwaer Syr Thomas Foley. Ymhlith pum plentyn y briodas yr oedd Caroline (isod) a John (isod). Bu farw 27 Ebrill 1826 yn Bath.

Ceir manylion llawnach am yrfa Symmons yn y D.N.B. O 1787 ymlaen bu'n brysur yn cyhoeddi llyfrau - rhai ohonynt yn bregethau, gan gychwyn gyda phregeth a argraffwyd yn 1787; pregeth a draddododd yng Nghaergrawnt a barodd iddo symud o'r brifysgol honno, ac yntau ar fin cymryd ei D.D., i Goleg Iesu, Rhydychen (24 Mawrth 1794), lle y derbyniwyd ef yn D.D. ddeuddydd yn ddiweddarach. Cafwyd mwy nag un argraffiad o rai o'r llyfrau a enwir isod: (a) Inez, 1796, trasiedi; (b) Constantia, 1800, cân ddramatig; (c) Life of Milton, 1806; (ch) Poems by Caroline (ei ferch) and Charles Symmons, 1812 - bu Caroline farw o'r darfodedigaeth 1 Mehefin 1803; (d) The Aeneis of Virgil translated, 1817; (dd) Life of Shakespeare, 1826.

Mab iddo oedd

JOHN SYMMONS (1781 - 1842), bargyfreithiwr

Bu yn Ysgol Westminster, yn Christ Church, Rhydychen (ymaelodi 11 Ebrill 1799, B.A. 1803, M.A. 1806), ac a ddaeth yn fargyfreithiwr (Lincoln's Inn), 24 Tachwedd 1807, a dewis ymarfer yng nghylchdaith Cymru. Cyfieithodd Agamemnon Æschylus a bu'n cynorthwyo ei dad i gyfieithu gwaith Fersil. Bu farw yn 1842, yn Deal o bosibl.

Awdur

Syr William Llewelyn Davies, (1887 - 1952)

Ffynonellau

Oxford Dictionary of National Biography, a'r cyfeiriadau a roddir yno
W. R. Williams, The parliamentary history of the principality of Wales, from the earliest times to the present day, 1541-1895 (Brecknock 1895)
James Allen, Notes on the Sheriffs of Pembrokeshire, 1541-1899 (Dinbych 1900)
Richard Fenton, A Historical Tour through Pembrokeshire (London 1811) (arg. 1903), 188-9

Darllen Pellach

Charles Symmons, On the consideration due to the clergy from their importance in society. A sermon preached at the Anniversary Meeting of the Sons of the clergy, of Pembrokeshire, on Tuesday June 30, 1789, in the Parish Church of St. Mary, Haverfordwest (Carmarthen 1789)
Erthygl Wicipedia: Charles Symmons

Dolenni Ychwanegol

Wikidata: Q20804782

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/