THOMAS, THOMAS (1880 - 1911), paffiwr

Ganwyd 8 Ebrill 1880 yng nghartref ei fam yng Nglynarthen, Ceredigion, ac fe'i magwyd ar fferm Carncelyn, Penygraig, Rhondda. Dechreuodd ei yrfa ar hyd y ffordd anodd, yn teithio o le i le â bwth paffio gyda James Driscoll a ' Freddie Welsh ' (F. H. Thomas). Ei brif ddull o'i baratoi ei hun ar gyfer ymladd oedd marchogaeth ar gefn ceffyl heb gyfrwy, a hyn, gan amlaf, ar hyd y bryniau uwchben Penygraig. Cynilodd bob ceiniog o'i enillion, ac er mwyn arbed talu arian am sparring partners, ymladdai â tharw o'r enw 'Billy One-horn.'

Ar ôl dyfod yn gampwr trymbwys y Rhondda, aeth Thomas i Lundain ac enillodd y gystadleuaeth ganolbwys yn y National Sporting Club. Yn 1899 enillodd bedair buddugoliaeth ychwanegol. Ond ei ymladdfa lwyddiannus gyntaf o bwys oedd honno ym Mai 1906 yn erbyn y Gwyddel, Pat O'Keefe. Pan gynigiwyd y ' Lonsdale Belt ' gyntaf i'r dosbarth o baffwyr canolbwys yn 1909, rhoddwyd ef i ymladd â Charlie Wilson, a churodd ef o fewn dwy rownd. Thomas felly oedd y cyntaf ym Mhrydain i ddal y ' Lonsdale Belt ' yn ei ddosbarth (canolbwys).

Bu farw 13 Awst 1911 yng Ngharncelyn o drawiad ar y galon yn sgil niwmonia.

Awdur

• Dr Moelwyn Idwal Williams

Ffynonellau

• Boxing News world's premier fight weekly, 20 Awst 1947, 5
• Western Mail, 14 Awst 1911 a 2 Rhagfyr 1949 ('Former Welsh Boxing Champions,' rhif 11, gan Tudor James)

Darllen Pellach

• Death of Great Boxer, The Rhondda Leader, 19 Awst 1911, t.1
• Funeral of Tom Thomas, The Rhondda Leader, 26 Awst 1911, t.6
• Noted Boxer's Will, The Rhondda Leader, 28 Hydref 1911, t.3
• BoxRec: Tom Thomas
• Erthygl Wicipedia: Thomas Thomas (paffiwr)

Dolenni Ychwanegol

• Wikidata: Q7794427

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/