WILLIAMS, ANNA (1706 - 1783), bardd

Ganwyd yn Rosemarket, Sir Benfro, merch Zachariah Williams. Aeth i Lundain gyda'i thad c. 1727 a byw yno heb fod ganddynt rhyw lawer at eu cynhaliaeth; am gyfnod bu'n byw gyda'i thad yn y Charterhouse, a chan fod hynny yn groes i'r rheolau gorfodwyd i'r tad ymadael oddi yno. Erbyn 1740 yr oedd bron â bod yn gwbl ddall ond llwyddodd i'w chynnal ei hun trwy waith ei nodwydd. Cyhoeddwyd yn 1746 ei chyfieithiad o fywyd yr ymherodr Julian gan Bleterie. Aeth yn hollol ddall ar ôl cael triniaeth llawfeddygol yn 1752 eithr cyn hyn yr oedd wedi ennyn diddordeb dyngarol y Dr. Samuel Johnson, a rhoes ef lety iddi am gyfnodau hir hyd ddiwedd ei hoes. Cyhoeddwyd ei Miscellanies in Prose and Verse yn 1766; rhoes y Dr. Johnson beth cymorth iddi gyda'r gwaith hwn. O'r amser hwn ymlaen gwaethygodd ei hiechyd a bu farw 6 Medi 1783. Rhoddwyd yr ychydig eiddo a adawodd ar ei hôl i'r Ladies' Charity School. Y mae'n amheus ai hyhi a ysgrifennodd bopeth a briodolid iddi; ychydig, yn wir, sydd o haeddiant ynddo.

Awdur

• Yr Athro Gwyn Jones, (1907 - 1999)

Ffynonellau

• Oxford Dictionary of National Biography
• Geirlyfr Bywgraffiadol o Enwogion Cymru (1870)
• Notable Welshmen (1700–1900) (1908)
• D. E. Baker, Biographia Dramatica (London 1812), 1812, I, ii, 748

Darllen Pellach

• Erthygl Wicipedia: Anna Williams

Dolenni Ychwanegol

• VIAF: 5294952
• Wikidata: Q772966

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/