WILLIAMS, JOHN ('Ioan Madog '; 1812 - 1878), gof a bardd

Ganwyd 3 Medi 1812 yn y Bontnewydd, Rhiwabon, lle yr oedd ei rieni, Richard ac Elinor Williams, yn byw ar y pryd. Dychwelasant ymhen tua naw mlynedd i'r cartref gwreiddiol yn Nhremadog. Bu'r mab mewn ysgol am dymor yn Nhremadog, ac, yn ddiweddarach, mewn ysgolion yn sir Ddinbych ac yng Nghaernarfon. Yn y cyfamser dysgodd ddilyn galwedigaeth ei dad. Ymddiddorodd mewn barddoniaeth yn gynnar; dechreuodd gystadlu mewn eisteddfodau, gan ennill yn Aberffraw, 1849, Rhuddlan, 1850, eisteddfod Madog, 1851, etc. Cafodd ei urddo'n fardd yn eisteddfod y Bala, 1836. Dywed ' Cynhaiarn ' fod iddo gryn fedr yng ngwneuthur offer haearn i'w defnyddio ar y llongau a adeiledid ym Mhorthmadog. Bu farw 5 Mai 1878 a chladdwyd ef ym mynwent eglwys Ynyscynhaiarn.

Awdur

• Syr William Llewelyn Davies, (1887 - 1952)

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908), a'r ffynonellau a enwir yno
• Cymru (O.M.E.), x, 229-37
• Thomas Jones, Gwaith Barddonol Ioan Madog ynghyd â Bywgraffiad o'r awdwr, a llythyrau oddiwrth rai o brif feirdd y genedl (Pwllheli 1881)

Darllen Pellach

• Erthygl Wicipedia: John Williams

Dolenni Ychwanegol

• Wikidata: Q20568748

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/