JONES, THOMAS ('Cynhaiarn '; 1839 - 1916), cyfreithiwr a bardd

Ganwyd 10 Chwefror 1839, yn fab i John a Jane Jones, Pen-lôn, Pwllheli. Pan yn 13 oed dechreuodd weithio mewn swyddfa cyfreithiwr ym Mhorthmadoc, ac yn 1867 gorffennodd ei hyfforddiant fel cyfreithiwr. Bu wedi hyn yn gofrestrydd llys sirol ym Mhorthmadog a Ffestiniog, ac yn glerc tref Cricieth. Ceidwadwr oedd yn wleidyddol, ac Annibynnwr o ran crefydd. Gwyddys amdano yn bennaf, fodd bynnag, fel bardd. Yr oedd ar ei orau mewn darnau byrion, yn enwedig mewn dychangerddi. Enillodd dychangerdd o'i waith wobr yn eisteddfod genedlaethol Y Rhyl yn 1892. Yr oedd yn feistr hefyd ar yr englyn. Cyhoeddwyd llawer o'i farddoniaeth mewn cylchgronau, ond yn ôl pob tebyg erys llawer o'i waith heb ei gyhoeddi oherwydd ei natur 'rabelaisaidd'. Pan yn ieuanc yr oedd yn aelod o'r cylch llenyddol a ymgasglodd oddi amgylch i Ellis Owen o Gefn-y-meysydd. Yn 1881 casglodd a chyhoeddodd farddoniaeth Ioan Madog. Bu farw 22 Hydref 1916, a chladdwyd ef ym mynwent Deneio, Pwllheli.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Geninen, Mawrth 1918, 55-80
• J. Jones ('Myrddin Fardd'), Enwogion Sir Gaernarfon (1922), 218

Dolenni Ychwanegol

• Wikidata: Q20804794

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/