WILLIAMS, JOHN ('Ioan Mai'; 1823 - 1887), bardd

Ganwyd 13 Mai 1823 yng Nghaernarfon fab i Benjamin a Mary Williams. Addysgwyd ef yn yr Ysgol Genedlaethol yno, ac yna fe'i prentisiwyd i'r Mri. W. Potter, llyfrwerthwyr yng Nghaernarfon a Phwllheli. Tua 1847 agorodd John Williams ei siop lyfrau ei hun yn Bridge Street, Caernarfon, ac er nad oedd ond glaslanc prin ei gyfleusterau, llwyddodd ar ei union. Yr oedd yn ddarllenwr mawr iawn, a datblygodd ddiddordebau llenyddol helaeth a wnaeth iddo gyfeillion o'r athrawon Joseph Loth, o Brifysgol Rennes, ac E. B. Cowell, Caergrawnt. Dywedir iddo gynorthwyo'r olaf gyda'i gyfieithiadau Saesneg o weithiau Dafydd ap Gwilym. Ysgrifennodd 'Ioan Mai' lawer o gerddi rhydd, rai ohonynt gogyfer â chystadleuthau eisteddfodol, ond er bod ei draethawd anorffenedig, 'The characteristics of Welsh poetry,' yn profi ei fod yn medru'r cynganeddion, ni sgrifennodd ond ychydig iawn yr y mesurau caeth. Cyfieithodd rai o gywyddau Dafydd ap Gwilym, a emynau Ann Griffiths, ac o gerddi'Ceiriog,' yn Saesneg. Bu'n pregethu'n gynorthwyol gyda'r Wesleaid am 47 mlynedd. Priododd â Margaret, unig ferch Hugh Hughes, Tynewydd, Trefriw, a bu iddynt chwech o blant. Bu farw 14 Hydref 1887, a chladdwyd ym mynwent Llanbeblig. Cyhoeddwyd detholiad o'i bregethau yn y gyfrol o'i waith a olygwyd gan John Lloyd Pierce.

Awdur

• Dr David Jenkins, (1912 - 2002)

Ffynonellau

• John Williams, D. Lloyd Jenkins, John Lloyd Pierce (gol.), Gweithiau Ioan Mai: wedi eu trefnu a'u golygu gan John Lloyd Pierce, yn nghyda byr gofiant o'r awdwr gan Dr. Jenkin Lloyd (Porthmadog 1891)

Dolenni Ychwanegol

• Wikidata: Q28361544

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/