WILLIAMS, JOHN (1833 - 1872), Biwmares, hynafiaethydd a chyfreithiwr

Ganwyd 7 Rhagfyr 1833, mab hynaf John Williams, Trosyrafon, curad parhaol Llanfaes, Llangoed, a Phenmon. Ymsefydlodd ym Miwmares fel cyfreithiwr mewn partneriaeth â'i frawd, a gweithredai, hefyd, fel 'agent' dros stad Carreglwyd. Yr oedd yn hynafiaethydd diwyd ac o gryn safon, ac ymddiddorai'n arbennig yn hanes hen deuluoedd bonheddig Môn. Ymysg ei waith cyhoeddedig y mae: David Hughes, M.A., and his Free Grammar School at Beaumaris (Bangor, 1864), ' Penmynydd and the Tudors ' (Archæologia Cambrensis, 1869); Hen Blas (The Old Palace) in Beaumaris (Holyhead, 1869), a ' The History of Berw ' (Supplement, Transactions of the Anglesey Antiquarian Society and Field Club, 1915); erys rhagor o ffrwyth ei lafur mewn llawysgrif yn y Llyfrgell Genedlaethol. Bu farw 8 Ionawr 1872.

Awdur

• Emyr Gwynne Jones, (1911 - 1972)

Ffynonellau

• J. E. Griffith, Pedigrees of Anglesey and Carnarvonshire Families (1914), 134
• Archaeologia Cambrensis, 1872, 65
• rhagymadrodd i 'The History of Berw' (Trafodion Cymdeithas Hynafiaethwyr a Naturiaethwyr Môn, Suppl., 1915)
• Sir Ralph Williams, How I became a Governor (1913), 22
• Am restr o'i weithiau anghyhoeddedig, gweler Handlist of Manuscripts in the National Library of Wales, i, 123-5

Dolenni Ychwanegol

• VIAF: 305278551
• Wikidata: Q20733683

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/