WILLIAMS, ROGER (1667 - 1730), gweinidog gyda'r Annibynwyr

Yr oedd yn aelod o eglwys Cefnarthen, Sir Gaerfyrddin, ac addysgwyd ef ond odid yn athrofa Rhys Prydderch, Ystradwallter. Urddwyd ef yn weinidog i eglwysi Cefnarthen a Chwm-y-glo, Merthyr Tydfil, yn 1698. Arminiad ydoedd o ran ei ddaliadau diwinyddol, a bu hynny'n achos o derfysg rhyngddo ag aelodau Calfinaidd yr eglwysi. Crewyd rhwygiadau ynddynt ar ôl ei ddydd (gweler dan Davies, James, a fu farw 1760). Bu farw 25 Mai 1730, yn 63 oed, ac urddwyd John a David Williams yn weinidogion i Gefnarthen. Gwyddys fod John yn fab iddo, a thebyg fod David yntau o'r un gwehelyth. Yr oedd y Williamsiaid yn gryf yng Nghefnarthen, ac aelodau o'r tylwyth oedd Morgan Williams, Ty'n-coed, ysgrifennydd medrus yr eglwys ac un o leygwyr amlycaf yr Ymneilltuwyr yn Sir Gaerfyrddin, a William Williams, Tredwstan, ei frawd; a John Williams, Cefncoed, tad Williams, Pantycelyn.

Awdur

• Y Parchedig Gomer Morgan Roberts, (1904 - 1993)

Ffynonellau

• Hanes Eglwysi Annibynnol Cymru, ii, 248, 256; iii, 582, 588
• Y Tyst, 7 Hydref 1948
• G. M. Roberts, Y Pêr Ganiedydd [Pantycelyn]. Cyfrol 1 Trem ar ei fywyd; Cyfrol 2: Arweiniad i'w waith (Aberystwyth 1949, 1958), 16-24

Dolenni Ychwanegol

• Wikidata: Q20821445

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/