WILLIS-BUND (gynt WILLIS), JOHN WILLIAM (1843 - 1928), ysgrifennwr ar hanes yr Eglwys yng Nghymru

Ganwyd yn 1843 yn Wick Episcopi, sir Gaerwrangon; aeth i Eton ac i Goleg Caius yng Nghaergrawnt, a graddiodd yn y gyfraith gydag anrhydedd yn y dosbarth blaenaf; galwyd i'r Bar o Lincoln's Inn, ac yr oedd yn F.S.A. Gwasnaethodd ei sir enedigol ar hyd ei fywyd, a bu'n gadeirydd ei brawdlys chwarterol a'i chyngor sir. Bu farw 7 Mehefin 1928. Ymddiddorai yn hanes yr eglwys yng Nghymru; cyfrannai i gylchgronau'r Cymmrodorion (noder ei bapur ar Peckham yn Trafodion Anrhydeddus Gymdeithas y Cymmrodorion, 1900-1), a golygodd ' Lyfr Du Tyddewi ' dros y gymdeithas honno (1902) - nid yn foddhaol iawn. Cyhoeddodd hefyd lyfr, The Celtic Church of Wales, 1897; seiliwyd hwnnw ar theori o'i eiddo ef ei hunan, a barnwyd y llyfr gan Louis Gougaud yn ' amheus ac unochrog,' a chan J. E. Lloyd yn ' ddi-drefn iawn.'

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Manylion ei yrfa o Who was who?

Dolenni Ychwanegol

• VIAF: 17595766
• Wikidata: Q6264290

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/