BIGGS, NORMAN (1870 - 1908), chwaraewr pêl droed (Rygbi)

Ganwyd 3 Tachwedd 1870 yng Nghaerdydd, yn drydydd mab i John Biggs, ac yn aelod o deulu y bu cynifer â phump ohonynt (heblaw ef) yn cynrychioli Caerdydd ar y maes Rygbi. Addysgwyd ef yng Ngholeg y Brifysgol, Caerdydd, ac yn Trinity Hall, Caergrawnt; bu wedyn ym musnes ei dad. Chwaraeai ar yr asgell dros Gaerdydd, gan ddechrau yn 1887. Bu'n cynrychioli Cymru wyth o weithiau yn 1893 a 1894; ei ddiwrnod mawr oedd hwnnw yn Edinburgh yn 1893, pan fu ei gyflymdra a'i fedr yn foddion i ennill y fuddugoliaeth gyntaf i Gymru ar Sgotland, a chyda hi'r ' Goron Driphlyg ' am y tro cyntaf erioed. Ef oedd capten Caerdydd yn y blynyddoedd hynny, a thano ef y chwaraeodd E. Gwyn Nicholls gyntaf dros Gaerdydd. Heblaw chwarae dros Gaerdydd, bu Biggs yn chwarae dros Richmond, dros Brifysgol Caergrawnt, a thros y 'London Welsh.'

Aeth allan gyda 'Yeomanry' Morgannwg i'r rhyfel â'r Boëriaid, a daeth yn gapten. Wedi'r rhyfel, aeth i Nigeria yn swyddog yn yr heddlu milwrol; lladdwyd ef yno 27 Chwefror 1908.

Awdur

• Dr Moelwyn Idwal Williams

Ffynonellau

• Cardiff Rugby Football Club History, 113
• The Times, 4 Mawrth 1908
• South Wales Daily News, 4 Mawrth 1908
• W. J. T. Collins, Rugby Recollections (1948), 116

Darllen Pellach

• Captain Norman Biggs Killed in Northern Nigeria, Evening Express, 3 Mawrth 1908, t.3
• Norman Biggs Dead, The Cardiff Times, 7 Mawrth 1908, t.8
• BBC News: Six Nations: The Wales rugby international 'shot by a poison arrow'
• Roath Local History Society: Norman Biggs – Welsh rugby international killed by a poisoned arrow
• Erthygl Wicipedia: Norman Biggs

Dolenni Ychwanegol

• Wikidata: Q3343747

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/