EVANS, JAMES THOMAS (1878 - 1950), prifathro coleg y Bedyddwyr, Bangor

Ganwyd 1 Mawrth 1878 yn Abercwmboi, yn fab i William Evans ac Ann Williams ei wraig. Symudodd y teulu i Bont-y-gwaith, ac yno dechreuodd y mab bregethu. Bu am gyfnod yn academi Pontypridd cyn ei dderbyn i goleg a phrifysgol Bangor yn 1900, lle y graddiodd gydag anrhydedd mewn Hebraeg. Enillodd wobr y Deon Edwards ac ysgoloriaeth George Osborne Morgan, ac aeth i Leipzig am gwrs pellach o efrydiaeth. Enillodd M.A. Cymru yn 1905 a B.D. Llundain yn 1910. Etholwyd ef yn 1906 yn olynydd i'r Dr. Witton Davies yn athro Hebraeg yng ngholeg y Bedyddwyr, a dilynodd Silas Morris yn 1923 yn bennaeth y Coleg. Cyhoeddodd amryw ysgrifau, esboniad ar Lyfr Amos, ac yr oedd yn un o is-olygyddion y Geiriadur Beiblaidd a gyhoeddwyd gan Urdd Graddedigion y Brifysgol. Cyhoeddodd hefyd lawlyfr hylaw ar Grefydd yr Hen Destament. Bu yn llywydd Cymanfa Bedyddwyr Arfon, a rhoes wasanaeth mawr drwy'r blynyddoedd i'w enwad yn eglwysi'r Gogledd. Priododd 18 Medi 1907, Annie Humphreys. Bu farw 28 Chwefror 1950 a chladdwyd ef yng ngladdfa Glanwydden.

Awdur

• Y Parchedig Brifathro Tom Ellis Jones, (1900 - 1975)

Ffynonellau

• Seren Cymru, 24 a 31 Mawrth 1950
• Hanes Coleg y Bedyddwyr yng Ngogledd Cymru, 1862–1927 (1928), 104-6
• Penodau yn Hanes y Bedyddwyr Cymreig (1949), 119
• Who was who?, 1941-50

Dolenni Ychwanegol

• Wikidata: Q20733335

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/