ROGERS, RICHARD SAMUEL (1882 - 1950), gweinidog gyda'r Bedyddwyr, golygydd ac awdur

Ganwyd 12 Awst 1882 yn y Pwll, ger Llanelli, mab John ac Elizabeth Rogers, ac yno y dechreuodd bregethu yn bymtheg oed pan oedd yn ddisgybl yn yr ysgol sir. Enillodd wobr Dan Isaac Davies a graddiodd gydag anrhydedd mewn Cymraeg yng ngholeg y Brifysgol, Caerdydd. Enillodd gadair ei goleg a chadeiriau eraill, ond cefnodd yn fuan ar farddoni, a throes at ddiwinyddiaeth.

Ordeiniwyd ef yn Soar, Pontlotyn, yn 1906; aeth yn weinidog Rhos, Aberpennar, yn 1908, ac oddi yno yn 1915 i Gapel Gomer, Abertawe, lle'r arhosodd nes ymddeol yn 1948.

Cyhoeddodd ei lyfr Y Deyrnas a'r Ail Ddyfodiad yn 1914, ac ugain mlynedd yn ddiweddarach rhoes Prifysgol Cymru y radd M.A. iddo am draethawd ar Athrawiaeth y Diwedd, a chyhoeddwyd ei lyfr ar yr un testun y flwyddyn honno. Cyhoeddwyd ei esboniad Datguddiad Ioan yn 1944, a chyfrol o'i bregethau graenus, A'r Drws yn Gaead, yn 1948. Ysgrifennodd lawer i gyfnodolion, a chyfrannodd i'r Geiriadur Beiblaidd. Bu ei gyfrolau, Llyfr Gloywi Cymraeg (1920) a Camre'r Gymraeg (1926) yn boblogaidd a buddiol.

Bu'n aelod o Gyngor yr Eisteddfod Genedlaethol, Gorsedd y Beirdd, pwyllgor crefydd y B.B.C., a phwyllgor Llyfrgell Gyhoeddus Abertawe. Am gyfnod bu'n brifathro Ysgol Baratoi Ilston, ac yn Llywydd Undeb Bedyddwyr Cymru a Mynwy am 1946-47. Golygodd yr emynau i'r Llawlyfr Moliant Newydd, ac ef oedd golygydd Seren Cymru o 1936 hyd ei farwolaeth 21 Chwefror 1950.

Awdur

• Y Parchedig Richard Bryn Williams, (1902 - 1981)

Ffynonellau

• Dyddiadur a Llawlyfr Undeb Bedyddwyr Cymru a Mynwy, 1951
• Seren Cymru, Mawrth 1950

Dolenni Ychwanegol

• Wikidata: Q20821209

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/