HORSFALL TURNER, ERNEST RICHMOND (1870 - 1936), ysgolfeistr a hanesydd lleol

Ganwyd 13 Ionawr 1870 yn Brighouse, yn fab i Joseph Horsfall Turner, yntau hefyd yn ysgolfeistr a hanesydd lleol. Addysgwyd ef yn ysgol ei dad a dechreuodd ei yrfa fel athro yn yr ysgol honno. Yn ddiweddarach graddiodd ym Mhrifysgol Llundain. Bu'n athro ym Mlaenau Ffestiniog ac ym Mae Colwyn, ac yn 1895 penodwyd ef yn brifathro ysgol sir Llanidloes. Dysgodd Gymraeg, ac yna dechreuodd ymddiddori mewn hanes a daearyddiaeth leol. Ymhlith gweithiau eraill cyhoeddodd Wanderings in County Cardigan (d.d.), a The Municipal History of Llanidloes, 1908. Yn y rhain ceir darluniau pen ac inc o'i waith ef ei hun, oherwydd yr oedd yn ddarluniwr medrus. Yn ddiweddarach yn ei fywyd, yr oedd hefyd yn arlunydd mewn dyfrlliw. Wedi iddo ymddeol yn 1932 gwnaeth lawer o ymchwil ynglŷn â hanes y mudiad Siartaidd yn Sir Drefaldwyn, ac y mae ei lawysgrifau yn awr yn Llyfrgell Genedlaethol Cymru. Etholwyd ef yn aelod o gyngor tref Llanidloes yn 1901, a bu'n faer y dref ddwywaith, 1908 a 1927-8. Yn 1897 priododd Annie, merch J. N. Crowther, a bu iddynt un mab, a fu'n glerc tref Aberystwyth. Bu ei wraig farw yn 1923. Bu ef ei hun farw yn Llanidloes 13 Mawrth 1936 a chladdwyd ef yno.

Awdur

• Edward Ronald Morris

Ffynonellau

• The Montgomeryshire County Times, 18 Mawrth 1936
• Welsh Secondary Schools Review, 1930
• gwybodaeth gan ei fab

Dolenni Ychwanegol

• Wikidata: Q20733004

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/