EVANS, JOHN RICHARDS (1882 - 1969), gweinidog (MC) ac awdur

Ganwyd 10 Ionawr 1882 yn Manchester House, Pen-y-graig, Cwm Rhondda, Morgannwg, mab William a Margaret Evans. Addysgwyd ef yn ysgol uwchradd Caerdydd, ysgol ganolradd y Porth, ac, ar ôl dechrau pregethu, yng Ngholeg y Brifysgol, Caerdydd (lle graddiodd yn y celfyddydau), a cholegau diwinyddol Trefeca ac Aberystwyth (lle graddiodd mewn diwinyddiaeth). Ordeiniwyd ef yn 1909, a bu'n gweinidogaethu yn y Bwlch, Brycheiniog (1906-10), a Bethlehem, Aberpennar, Morgannwg (1914-39). Ymddeolodd o ofal bugeiliol yn 1939, ac yng Nghaerdydd y bu ei gartref hyd ddiwedd ei oes. Priododd, 1941, Anne May Thomas.

Yr oedd J.R. Evans, yn ei ddydd, yn un o brif arweinwyr y MC. Bu'n llywydd Sasiwn y De (1952), ac yn llywydd y Gymanfa Gyffredinol (1955). Ef, a'r esgob Havard, oedd llywyddion cyntaf Cyngor Eglwysi Cymru; bu'n cynrychioli eglwysi Cymru yng nghynhadledd gyntaf Cyngor Eglwysi'r Byd. Ef hefyd oedd cynrychiolydd ei gyfundeb ar y Presbyterian Alliance. Traddododd y Ddarlith Davies yn 1938, ac fe'i cyhoeddwyd yn 1941 dan y teitl Cristnogaeth a'r bywyd da. Cyn hynny, yn 1923, cyhoeddodd werslyfr defnyddiol, Y Proffwydi a'u cenadwri. Ysgrifennodd lawer i'r Goleuad, Y Drysorfa, a'r Traethodydd - bu'n un o olygyddion yr olaf o 1952 hyd ei farwolaeth. Bu farw 10 Chwefror 1969, a chladdwyd ei weddillion ym medd y teulu yn Nhrealaw, Cwm Rhondda.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Traethodydd, 1969, 134-36
• Blwyddiadur y Methodistiaid Calfinaidd, 1970, 279-80
• gwybodaeth gan ei weddw (trwy law M.R. Mainwaring, Caerdydd, Caerdydd)
• adnabyddiaeth bersonol

Dolenni Ychwanegol

• Wikidata: Q20733636

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/