HAYCOCK, (BLODWEN) MYFANWY (1913 - 1963), artist ac awdur

Ganwyd yng Nglyndŵr, Mount Pleasant, Pontnewynydd, Mynwy, 23 Mawrth 1913, yr ieuangaf o dair merch James David Haycock, glöwr (a adweinid yn lleol fel Jim Pearce) ac Alice Maud (ganwyd Perry), y ddau'n enedigol o Fyn. Addysgwyd hi yn ysgol elfennol Cwm-ffrwd-oer, ysgol ramadeg merched Pont-y-pŵl, Coleg Technegol Caerdydd (y coleg celf yn ddiweddarach). Ymwrthododd â gyrfa fel athrawes celf a chymerodd at newyddiaduraeth rydd ar gyfrif ei medr fel darlunydd mewn du a gwyn, a'i llwyddiant gyda thelyneg Saesneg yn Eisteddfod Genedlaethol Aberafan yn 1932, dan feirniadaeth W.H. Davies. O'r flwyddyn 1936 ymddangosodd ei cherddi a'i storïau, wedi eu darlunio gyda dyluniadau sgrafwrdd yn y Western Mail a phapurau a chylchgronau eraill. Pan dorrodd Rhyfel Byd II allan aeth yn glerc cyflogau mewn ffatri cad-ddarpar, yna'n eu tro yn swyddog lles cynorthwyol mewn ffatri mewn ardal slymiau yng Nghaerdydd, athrawes, a swyddog hysbysrwydd i'r Institute of Agriculture ym Mrynbuga. Yn 1943 ymunodd â'r B.B.C. yn Llundain: darlledwyd dwy o'i dramâu radio a darllenwyd ei cherddi ar yr awyr. Wedi gadael y B.B.C. yn 1945 bu'n llwyddiannus mewn newyddiaduraeth yn Llundain, gan ysgrifennu erthyglau a cherddi, darlunio llyfrau, cynllunio cardiau Nadolig, a dod yn aelod o gyngor y Society of Women Journalists. Yng Ngorffennaf 1947 priododd Arthur Merion Williams o'r Borth (anaesthetigydd ymgynghorol i ysbyty sir Redhill a grŵp ysbytai dwyrain Surrey) yng nghapel Presbyteraidd Llanofer, a byw wedyn yn Buckland, ger Reigate, lle y magodd eu tri phlentyn. Ar waethaf afiechyd cynyddol parhaodd i ysgrifennu a darllen ei cherddi yn aml ar y teledu. Bu farw 9 Tachwedd 1963. Ei phedair cyfrol cyhoeddedig oedd: Fantasy and other poems (1937), Poems (1944), More poems (1945) ac wedi ei marw, Mountain over Paddington (1964). Yr oedd yn fardd argraffiaethol rhugl, 'her imagery often touched with elfin whimsicality' meddai A.G. Prys-Jones, a defnyddiai ffurfiau traddodiadol gydag effaith sydd ar dro'n adleisio W.H. Davies. Galwodd Wil Ifan hi'n 'ail lais Gwent' yn 1940.

Awdur

• Roland Glyn Mathias

Ffynonellau

• W. J. T. Collins, Monmouthshire writers. A literary history and anthology … (Casnewydd 1945) (1945)
• Some contemporary Anglo-Welsh writers (Caerdydd 1941), Llyfrgell Dinas Caerdydd (1941)
• Western Mail, 14 Tachwedd 1963
• gwybodaeth gan Miss Gwladys Haycock

Darllen Pellach

• Erthygl Wicipedia: Myfanwy Haycock

Dolenni Ychwanegol

• VIAF: 76089369
• Wikidata: Q15454409

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/