JONES, LLEWELYN (1894 - 1960), gweinidog (MC), golygydd ac awdur

Ganwyd yn 1894 yn Llandegfan, Môn, yn fab i J. E. Jones, gweinidog (MC) a'i briod o'r lle hwnnw. Addysgwyd ef yn ysgol sir Caergybi, Coleg y Brifysgol, Bangor (lle graddiodd yn y celfyddydau), a choleg Mansfield, Rhydychen (lle cafodd radd B.Litt.). Cafodd radd M.A. Prifysgol Cymru yn 1921 am draethawd ar emynyddiaeth y Diwygiad Methodistaidd gyda sylw arbennig i emynau Williams, Pantycelyn. Ordeiniwyd ef yn 1922, a bu'n gweinidogaethu ym Mae Colwyn (1922-24), Moriah, Utica, T.U.A. (1924-31), a Douglas Road, Lerpwl (1931-51). Penodwyd ef yn ysgrifennydd cyffredinol Cymdeithas Genhadol y MC yn 1951, ac ymwelodd â'r meysydd cenhadol yn India, Pacistan a Llydaw. Priododd, 1926, Elizabeth Margaret Edwards, a ganwyd iddynt ddau o feibion. Bu farw 24 Rhagfyr 1960.

Cyhoeddodd gyfrol ar hanes Moriah yn ystod ei gyfnod yn Utica. Rhoes wasanaeth mawr i fywyd Cymreig glannau Mersi; sefydlodd aelwydydd Urdd Gobaith Cymru yno a golygu Y Glannau o 1944 ymlaen. Bu'n aelod hefyd o fwrdd golygyddol Y Ffordd (cylchgrawn pobl ieuainc y MC). Cyhoeddodd hefyd Lawlyfr ar genhadaeth bersonol yn 1939. Ei gyfraniad pwysicaf yw'r gyfrol Aleluia gan y Parch. William Williams Pant y Celyn (1926), sef arg. diplomatig o rannau I-VI o Aleluia, 1744-47, Williams, Pantycelyn, gyda rhagarweiniad gwerthfawr. Gan fod copïau o'r Aleluia mor anarferol o brin, y mae'r gyfrol hon o werth amhrisiadwy i efrydwyr emynau Pantycelyn.

Awdur

• Y Parchedig Gomer Morgan Roberts, (1904 - 1993)

Ffynonellau

• Who's who in the Free Churches? (1951), 346
• Y Goleuad, 8 Chwefror 1961
• Blwyddiadur y Methodistiaid Calfinaidd, 1962, 259-60

Dolenni Ychwanegol

• VIAF: 106838184
• Wikidata: Q20804738

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/