MORGAN, JOHN JAMES (1870 - 1954), gweinidog (MC) ac awdur

Ganwyd ym Mawrth 1870 yng Nglynberws, Ysbyty Ystwyth, Ceredigion, mab Dafydd Morgan ('Y Diwygiwr') a Jane ei briod. Addysgwyd ef yn ysgol fwrdd Ysbyty Ystwyth; ysgol Ystradmeurig, ysgol Thomas Owens, Aberystwyth; Coleg Aberystwyth a Choleg Trefeca. Ordeiniwyd ef yn 1894, a bu'n gweinidogaethu yn y Bont-faen, Morgannwg (1893-95) a'r Wyddgrug (1895-1946). Priododd 1895, Jeanetta Thomas, Llancatal, Bro Morgannwg. Ar ôl ymddeol aeth i fyw at ei ferch yn Irby, sir Gaer, ac yno y bu farw 23 Ionawr 1954.

Ymhyfrydodd mewn llenydda ar hyd ei oes, a cheir ei gynhyrchion - o nodwedd hanesyddol - yng nghylchgronau'i enwad. Yr oedd ganddo'r ddawn i gasglu dywediadau pert a bachog a hynodion blaenoriaid a phregethwyr. Cyhoeddodd nifer o gofiannau defyddiol iawn: Hanes Dafydd Morgan a Diwygiad '59 (1906); Cofiant Edward Matthews (1922); Cofiant Evan Phillips (1930); a Hanes Daniel Owen (1936). Yn niwedd ei oes cyhoeddodd ei hunangofiant a'i atgofion, sy'n hynod o ddiddorol, yn dair o gyfrolau (1948, 1949 ac 1953) dan y teitl A welais ac a glywais.

Awdur

• Y Parchedig Gomer Morgan Roberts, (1904 - 1993)

Ffynonellau

• Blwyddiadur y Methodistiaid Calfinaidd, 1955, 247-48
• Y Goleuad, 10 Mawrth 1954
• ei gofiant i'w dad a'i hunangofiant

Dolenni Ychwanegol

• Wikidata: Q20751812

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/