NEPEAN (ganwyd BELLIS), MARY EDITH (1876 - 1960), nofelydd

Ganwyd yn Llandudno, Caernarfon, 1876 yn ferch i John Bellis, un o gynghorwyr sir Gaernarfon a Mary ei wraig. Cafodd ei haddysg gartref, astudiodd gelfyddyd gyda Robert Fowler, ac yn ddiweddarach cafodd beth o'i gwaith ei arddangos mewn nifer o arddangosfeydd. Priododd yn 1899 Molyneux Edward Nepean, un o deulu o weision sifil uchel eu graddfa, ac aeth i Loegr i fyw, gan gymdeithasu mewn cylchoedd llenyddol yn Llundain. Yn 1932 cyhuddodd Caradoc Evans o enllib yn ei herbyn yn ei nofel Wasps (1933), a gorfododd iddo wneud newidiadau yn y llyfr cyn ei gyhoeddi. Cymerodd ran yn y bywyd cyhoeddus, gan ddod yn ' Commandant ' adran yn y Groes Goch yn swydd Caint, a theithiodd yn helaeth yn y Dwyrain Agos a'r Balcaniaid gan gymryd diddordeb arbennig ym mywyd sipsiwn Transilfania.

Cyhoeddwyd ei nofel gyntaf, Gwyneth of the Welsh Hills, yn 1917, sy'n dangos dylanwad arddull Allen Raine (Anne Adalisa Puddicombe) a Caradoc Evans. Dilynwyd hon gan 34 o nofelau rhamantaidd, ysgafn, bron i gyd gyda chymeriadau a chefndir Cymreig. Ysgrifennodd un teithlyfr, Romance and realism in the Near East (1933), ynghyd â llawer o erthyglau poblogaidd i'r wasg newyddiadurol. Bu farw ei gŵr yn 1948. Bu hithau farw 23 Mawrth 1960 a chladdwyd hi ym mynwent Y Gogarth, Llandudno.

Awdur

• Sally Roberts Jones

Ffynonellau

• Who was who?
• T. Ll. Williams, Caradoc Evans (Caerdydd 1970) (1970), 93-4
• Llandudno and District Advertiser, 26 Mawrth a 2 Ebrill 1960

Darllen Pellach

• Erthygl Wicipedia: Edith Nepean

Dolenni Ychwanegol

• VIAF: 34243903
• Wikidata: Q20566881

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/