WILLIAMS, HUGH (1862 - 1953), gweinidog (MC) ac esboniwr beiblaidd

Ganwyd ef yn 1862 yn y Rhos-goch, Rhos-y-bol, Môn. Dechreuodd bregethu c. 1885-86 yn y Gorslwyd, a bu'n arolygu eglwys Rhos-goch am lawer o flynyddoedd. Addysgwyd ef yn ysgol Gwredog, ac fe'i noddwyd gan deulu Gwredog a'i alluogi i fynd i Goleg y Bala. Cymerodd y Prifathro Thomas Charles Edwards ddiddordeb ynddo, a bu'n ysgrifennydd preifat i'r gŵr hwnnw am dymor, - ef a drosodd i'r Gymraeg Ddarlith Davies y prifathro, Y Duw-ddyn. Aeth am daith i'r Almaen a meistroli'r Almaeneg i ryw raddau. Dychwelodd i Fôn a'i ordeinio yn 1897. Cyhoeddodd gyfres o wyth neu naw o esboniadau ar lyfrau'r Testament Newydd rhwng 1901 ac 1923, a bu cryn fri arnynt yn yr ysgolion Sul. Bu'n astudio Athrawiaeth yr Iawn am flynyddoedd, a thraddododd y Ddarlith Davies ar y maes hwnnw yn 1945 gan ei chyhoeddi dan y teitl Grym y groes yn 1948. Cafodd radd D.D. gan brifysgol Princetown (T.U.A.) ar sail traethodau ar yr athrawiaeth a drafodir yn y gyfrol honno. Bu farw 25 Awst 1953 yn Amlwch yn 91 mlwydd oed.

Awdur

• Y Parchedig Gomer Morgan Roberts, (1904 - 1993)

Ffynonellau

• Hugh Owen (gol.), Braslun o hanes Methodistiaid Calfinaidd Môn (1880-1935) (Lerpwl 1937) (1937), 95, 341
• Blwyddiadur y Methodistiaid Calfinaidd, 1954, 233
• H. Ll. Williams, Braslun o Hanes Methodistiaeth Galfinaidd Môn 1935–70 (1977) (1977), 103-4

Dolenni Ychwanegol

• Wikidata: Q20821151

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/