YORKE, SIMON (1903 - 1966)

y pumed o'r enw hwn o ddisgynyddion Simon Yorke (1606 - 1682), groser cyfanwerthol o Dover, a oedd yn daid i Iarll Hardwicke; ganwyd 24 Mehefin 1903 yn fab hynaf i Philip Yorke (1849 - 1922), Erddig, Sir Ddinbych, a'i ail wraig Louisa Matilda (ganwyd Scott). Cafodd ei addysg ym Moorland House, Heswall; Coleg Cheltenham; a Choleg Corpus Christi, Caergrawnt. Graddiodd yn B.A. mewn coedwigaeth yn 1927. Etifeddodd Erddig ger Wrecsam yn 1922. Bu'n Uchel Siryf sir Ddinbych yn 1937. Er iddo fod yn lifftenant yn y Denbighshire Yeomanry, pan ddaeth Rhyfel Byd II ymunodd fel milwr cyffredin yn y North Staffordshire Regiment. Yn unol â'i ddymuniad arhosodd fel sapper, heb geisio na chael dyrchafiad.

Nid oedd ei berthynas â'i denantiaid yn hapus. Gwrthodai iddynt gael trydan na theliffon yn eu ffermydd. Er nad ydoedd yn heliwr, dilynai'r cwn hela ar gefn beic a gwyddai bob amser ymhle yr oedd y llwynog. Cafwyd ef yn farw o fethiant y galon ym Mharc Erddig, 7 Mai 1966, a chladdwyd ef ym mynwent eglwys Marchwiel. Nid oedd yn briod a bu farw yn ddiewyllys. Etifeddwyd Erddig gan ei frawd Philip Scott Yorke (1905 - 1976).

Awdur

• John Gwilym Jones

Ffynonellau

• Merlin Waterson, The Servants' Hall a domestic history of Erddig (Llundain 1980) (1980)

Dolenni Ychwanegol

• Wikidata: Q20734399

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/