LEWIS, WILLIAM MORRIS (1839 - 1917), gweinidog (MC)

Ganwyd 9 Mai 1839 yn Abergwaun, Penfro, mab y Parch. Enoch Lewis. Addysgwyd ef yn seminari'r Dr George Rees; Coleg y Bala, Coleg Normal Abertawe a Choleg Trefeca. Dechreuodd bregethu yn 1856, ac ordeiniwyd ef yn 1863. Priododd, 1859, Lettice Maria Lloyd, ac ymsefydlodd y ddau yn y Tŷ Llwyd ger Holywell, plwyf Llan-lwy, Penfro. Codwyd ganddynt gapel Treffynnon yn ymyl eu cartref, a buont yn gefn mawr i'r achos. Bu'n llywydd Sasiwn y De yn 1893-94. Cyfrifid ef yn ei ddydd yn gryn ddiwinydd ac ysgolhaig Beiblaidd, a bu'n gohebu ac ysgolheigion megis Adolf Harnack ac H. M. Gwatkin; cyfeillachai hefyd â Thomas Charles Edwards. Cyfrannodd lawer i'r Traethodydd, Y Drysorfa, ac i gylchgronau Saesneg. Cyhoeddwyd ei Ddarlith Davies, ar Edifeirwch, a draddodwyd yng Nghymanfa Gyffredinol 1900. Troswyd ei esboniad ar Yr Epistol at yr Hebreaid i'r Almaeneg, ac addefai W. M. Ramsay rym ei ddadl mai Paul oedd ei awdur. Bu farw 26 Mai 1917, a chladdwyd ei weddillion ym mynwent Holywell.

Awdur

• Y Parchedig Gomer Morgan Roberts, (1904 - 1993)

Ffynonellau

• Monthly treasury: organ of the English Calvinistic Methodists, or Presbyterian Church of Wales, Tachwedd 1901
• Blwyddiadur y Methodistiaid Calfinaidd, 1918
• G. M. Roberts, Capel Treffynnon (1967)

Darllen Pellach

• 'Y Parch. W. Morris Lewis, Tyllwyd,' Trysorfa y Plant, Gorffenaf 1900, t.169-170
• Erthygl Wicipedia: William Morris Lewis

Dolenni Ychwanegol

• Wikidata: Q20804831

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/