LYNE, HORACE SAMPSON (1860 - 1949), llywydd Undeb Rygbi Cymru 1906-1947

Ganwyd yng Nghasnewydd, Mynwy, 31 Rhagfyr 1860 yn fab i Charles Lyne, maer y dref yn 1856 ac 1884. Addysgwyd ef yn Plymouth a'r Royal Naval College. Cyfreithiwr ydoedd wrth ei alwedigaeth. Chwaraeodd dros glwb rygbi Casnewydd fel cefnwr yn 18 oed, ond fel blaenwr deallus yr enillodd ei blwy fel capten y clwb 1883-84, a 6 chap dros Gymru 1883-1885. Fel cynrychiolydd y gêm yng Nghymru, bu'n un o sylfaenwyr y Bwrdd Rygbi Rhyngwladol yn 1886-87, a bu ei wasanaeth iddo'n ddi-dor, 1887-1938. Bu'n Llywydd urddasol Undeb Rygbi Cymru am gyfnod hwy na neb. Ef a Walter E. Rees a lywiodd rhyngddynt faterion rygbi yng Nghymru gydol hanner cyntaf yr ugeinfed ganrif. Bu'n amlwg ym mywyd cyhoeddus Casnewydd, ac urddwyd ef â rhyddfraint y dref yn 1934. Penodwyd ef yn ganghellor Esgobaeth Mynwy yn 1938, a bu'n aelod o Gorff Llywodraethol yr Eglwys yng Nghymru. Bu farw 1 Mai 1949 yng Nghasnewydd.

Awdur

• Yr Athro Gareth W. Williams

Ffynonellau

• David Smith a Gareth Williams, Fields of Praise. The official history of the Welsh Rugby Union 1881-1981 (Caerdydd 1980) (1980)
• Western Mail, 2 Mai 1949
• South Wales Argus, 7 Mai 1949

Darllen Pellach

• Erthygl Wicipedia: Horace Lyne

Dolenni Ychwanegol

• Wikidata: Q3140461

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/