AMBROSE, WILLIAM ROBERT (1832 - 1878), gweinidog gyda'r Bedyddwyr, a hynafiaethydd

Ganwyd 19 Ionawr 1832, yn y Galltraeth, Bryncroes, Llŷn, yn fab i'r Parch. Robert Ambrose (gweler Spinther, iii, t. 367) - yr oedd felly'n gefnder i'r bardd William Ambrose. Dygwyd ef i fyny'n deiliwr, a dilynodd yr alwedigaeth honno yng Nghaernarfon, Lerpwl, Bangor, Porthmadog, a Thalsarn. Yn 1856, bedyddiwyd ef (ym Mangor), a dechreuodd bregethu; ac ym mlynyddoedd olaf ei oes yr oedd yn fugail cyflogedig ar Fedyddwyr Talsarn, serch ei gyfri'n bregethwr trymaidd. Yn Nhalsarn, cymerodd gryn ran ym mywyd cyhoeddus yr ardal.

Enillodd amryw wobrau mewn eisteddfodau am farddoniaeth a thraethodau. Ei brif ddiddordeb oedd hynafiaethau; darlithiai ar y pwnc; a'i hawl i glod yw ei draethawd da, Hynafiaethau, Cofiannau, a Hanes Presennol Nant Nantlle (Pen-y-groes, 1872). Bu'n briod ddwywaith. Bu farw 21 Rhagfyr 1878.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Greal sef Cylchgrawn Misol at wasanaeth y Bedyddwyr, 1880, yn cynnwys rhestr o'i gyfansoddiadau

Darllen Pellach

• T. Morgan, Enwogion Cymreig 1700-1900 (1907), tt.9-10

Dolenni Ychwanegol

• Wikidata: Q20734704

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/