ANDREWS, JOSHUA (c.1708 - 1793), gweinidog gyda'r Bedyddwyr

Nid yw hanes ei ddechreuadau'n hysbys; ond yn 1732 neu 1733 daeth yn aelod o eglwys Miles Harri ym Mhen-y-garn. Yn 1736 aeth i Academi Bryste; yr oedd yn un o chwech o Gymry yno - un arall oedd Caleb Evans. Dychwelodd i bregethu'n gynorthwyol ym Mhen-y-garn; a thua 1740 urddwyd ef yn gydweinidog â Miles Harri, a gofal neilltuol yr achos ym Mryn Buga arno; ond nid oedd ei ddoniau'n boblogaidd. Bu'n cynorthwyo yn Llanwenarth yn 1743.

Yn 1745, sefydlwyd ef ar hen gynulleidfa enwog Olchon; ond yr oedd hefyd i fugeilio Capel-y-ffin, ugain milltir oddi wrth Olchon. Llafuriodd yn y ddau le mewn tlodi ac afiechyd mawr: 'dros fwy na hanner canrif, ymddangosai'n aml fel dyn ar farw.' Bu farw 14 Mehefin 1793 'tua 85 oed,' a chladdwyd ef yn Nhrosnant.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Rippon, The Baptist Annual Register Including sketches of the state of religion among different denominations of good men at home and abroadfor 1794-7 (diau mai Joshua Thomas a sgrifennodd y cofnod)

Dolenni Ychwanegol

• Wikidata: Q20733741

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/